जिल्ला अदालत बाँकेको आदेशपछि मात्र रिगललाई कारागार चलान गरिने
साझा परिवेश
शुक्रबार, कार्तिक १७, २०८० १३:0८
बाँके । सर्वोच्च अदालतले कैद माफी बदर गरेलगत्तै बाँके प्रहरीले नियन्त्रणमा लिएर हिरासतमा राखेको रिगल भनिने योगराज ढकाललाई जिल्ला अदालत बाँकेको आदेश लिएर मात्रै कारागार चलान गरिने भएको छ ।
सर्वोच्चबाट बिहीबार आदेश आएको केही घण्टामै प्रहरीले रिगललाई नेपालगन्जस्थित सेतु विक चोकबाट पक्राउ गरेको थियो । तर सर्वोच्च अदालतको आदेशको पूर्ण पाठ आइनसकेकाले प्रहरीले हिरासतमा राखेको छ । बाँकेका प्रमुख जिल्ला अधिकारी श्रवणकुमार पोखरेलले शुक्रबार आदेशको पूणपाठ आइपुग्ने र त्यसपछि अदालत लगेर कारागार चलानको आदेश माग गर्ने जानकारी दिए । उनले भने, ‘त्यसपछि जुन कारागारमा चलान गर्नू भन्ने आदेश आउँछ सोही कारागार चलान गरिनेछ ।’
जिल्ला सुरक्षा समितिका आधिकारीले ढकाललाई बिहीबारै कारागार चलान गर्न प्रहरीलाई सुझाव दिएका थिए । तर प्रहरीले अदालतबाट आदेश लिएर मात्र जेल चालन गर्ने भएको हो । जिल्ला सुरक्षा समितिका अधिकारीहरु सकेसम्म जहाँबाट छुटेको हो त्यहीँ (दाङ कारागार) चलान गर्ने पक्षमा छन् ।
