माओवादी र एकीकृत समाजवादीलाई समेटेर मन्त्रीमण्डल विस्तार
एमाले सरकारबाट बाहिरिने
विराटनगर । कोशी प्रदेशका मुख्यमन्त्री केदार कार्कीले मन्त्रीमण्डल विस्तार गरेका छन् । शुक्रबार केन्द्रीय सत्ता साझेदार दलहरु नेकपा माओवादी केन्द्र र एकीकृत समाजवादीलाई समेटेर मन्त्रीमण्डल विस्तार गरेका हुन् ।
संविधानको धारा १६८ (५) अनुसार मुख्यमन्त्री नियुक्त भएका कार्कीले मन्त्रीमण्डल विस्तार गरेर पाँच सदस्यीय बनाएका छन् । गत असोज २७ गते मुख्यमन्त्री नियुक्त भएका कार्कीले २८ गते एमालेबाट राम रानामगर र नेपाली कांग्रेसबाट शम्शेर राईलाई मन्त्री नियुक्त गरेका थिए । एमालेको असहमतिका बीच शुक्रबार उनले नेकपा माओवादीबाट गणेश उप्रेती (शुसिल) र नेकपा एकिकृत समाजवादीबाट कमलप्रसाद जबेगुलाई मन्त्री बनाएका हुन् ।
उप्रेती मोरङको क्षेत्र नम्बर २ (१) बाट निर्वाचित सांसद हुन् । उप्रेतीले हालसम्म कुनै पनि राजकीय जिम्मेवारी निर्वाह गरेका छैनन् । यता जबेगु पुराना बामपन्थी नेता हुन् । उनी यसअघि उद्धव थापा मुख्यमन्त्री हुँदा पनि मन्त्री मण्डलमा सहभागी भएका थिए । उनी पाँचथर १ (१) बाट प्रदेशसभामा निर्वाचित भएका थिए ।
एमाले सरकारबाट बाहिरिने
यता कार्कीलाई मुख्यमन्त्री बनाउन प्रमुख भूमिका खेलेको नेकपा एमाले भने कोशी प्रदेश सरकारबाट बाहिरिने भएको छ । आफ्नो सहमति बिना मन्त्रीमण्डल विस्तार गरेको भन्दै एमालेले सरकारबाट बाहिरिने बताएको हो ।
एमाले संसदीय दलका नेता हिक्मत कार्कीले भने, ‘हामी हिजो पनि सरकारको गठबन्धनमा थिएनौं, भोलि पनि हुँदैनौं । हामी सरकारबाट बाहिरिन्छौं । केन्द्रीय गठबन्धनमा भएका दल प्रदेश सरकारमा सामेल भएपछि हामी सरकारमा बसिरहँदैनौं ।’ एमालेले मुख्यमन्त्री कार्कीले गरेको सरकार विस्तारबारे आज बैठक बसेर औपचारिक निर्णय गर्ने जनाएको छ ।
एमालेको समर्थनमा कांग्रेसका ८ सांसदसहित विद्रोह गरेर संविधानको धारा १६८ को उपधारा ५ अनुसार मुख्यमन्त्री भएका कार्कीले सरकारमा गठबन्धन सामेल गर्ने कि एमाले मात्र भन्ने निर्णय गर्न नसक्दा सरकार विस्तार गर्न सकेका थिएनन् । कार्कीले सहमतीय सरकार बनाउन भन्दै एमालेसँग छलफल गरेपनि एमालेले माओवादी सरकारमा आए सरकारबाट बाहिरिने चेतावनी दिँदै आएको थियो । तर, मुख्यमन्त्री कार्कीले आफ्नो पार्टी कांग्रेस र गठबन्धनको दबाबको कारण गठबन्धनबाटै सरकारमा मन्त्री थप गर्ने निष्कर्षमा पुगेका हुन् ।
