काठमाडौं । अर्जेन्टिना तथा इन्टर मायामीका फरवार्ड लियोनल मेसी टाइम म्यागजिनको ‘एथ्लिट अफ द इयर’ घोषित भएका छन् ।
टाइम म्यागजिनले मेसीको अमेरिका आगमनपछि स्टेडियम पुग्ने समर्थकको संख्या, टिकट मूल्य, मर्चनडाइजको बिक्री र मेजर लिग सकर लिग हेर्ने दर्शकमा वृद्धि भएको उल्लेख गरेको छ । मेसी गत जुलाईमा मायामीमा आबद्ध भएका हुन् ।
उनले सबै प्रतिस्पर्धामा गरी १४ खेलमा ११ गोल गरेका छन् । मेसीको उत्कृष्ट प्रदर्शनको सहयोगमा मायामीले लिग्स कपको उपाधि जितेको थियो । मायामीको इतिहासमै यो पहिलो ठूलो उपाधि हो । मेसीले मायामीसँग सम्झौता गरेर असम्भवलाई सम्भव बनाएको भन्दै अमेरिकालाई फुटबलमा परिणत गरेको टाइमले उल्लेख गरेको छ ।
मेसीसँगै जिम्न्यास्ट सिमोन बाइल्स, पौडीका माइकल फेल्प्स र एनबीए सुपर स्टार लेबरोन जेम्सले यो अवार्ड जितेका हुन् । फ्रेन्च लिग वान क्लब पेरिस सेन्ट जर्मेन (पीएसजी)बाट मेसी साउदी क्लब जाने चर्चा चलेको थियो । तर बार्सिलोनाका पूर्वखेलाडी उनले सबै समाचारलाई गलत सावित गर्दै मायामी राजेका थिए ।
