सन्दीपको मुद्दा न्यायाधीश पाण्डेयको इजलासको १ नम्बरमा
साझा परिवेश
आइतवार, मंसिर २४, २०८० १२:२0
लामिछानेविरुद्धको मुद्दा पदमराज पाण्डेयको इजलासमा
नाबालिग भए नभएको एकीन गर्ने भन्दै दुईवटा आदेश
एक नम्बरमा लामिछानेविरुद्धको मुद्दा रहेको जानकारी
काठमाडौं ।।
नाबालिग बलात्कार आरोप लागेको सन्दीप लामिछानेविरुद्धको मुद्दा काठमाडौं जिल्ला अदालतका न्यायाधीश पदमराज पाण्डेयको इजलासमा परेको छ । लामिछानेलाई गत वर्षको कात्तिक १४ गते नाबालिग गौशाला २६ (छ) लाई जबरजस्ती करणी गरेको आरोप छ । उनीविरुद्ध गत वर्ष कात्तिकमै मुद्दा दायर भएपनि फैसला भने भइसकेको छैन । यसअघि जिल्ला अदालतले वकिलहरूलाई लिखित बहस नोट पेस गर्न मंसिर २२ सम्मको समय दिँदै मंसिर २४ गतेका लागि पेसी तोकिएको थियो ।
यसअघि गौशाला २६ (छ) नाबालिग भए नभएको एकीन गर्ने भन्दै दुईवटा आदेश भएका छन् । त्यसबाहेक न्यायाधीश राजु खतिवडाको इजलासबाट गौशला २६ (छ) की आमाको उमेर एकीन गर्ने समेत आदेश भएको थियो । न्यायाधीश पाण्डेयको इजलासमा आज तीन मुद्दा मात्र परेकोमा एउटा स्थगित भइसकेको छ । अर्को बैंकिङ कसुरसम्बन्धी मुद्दा छ भने एक नम्बरमा लामिछानेविरुद्धको मुद्दा रहेको छ ।
