मोरङको मिक्लाजुङमा आज प्रधानमन्त्री प्रचण्डले सम्बोधन गर्ने ; पहिचानबादिले अवरोध नगर्ने
साझा परिवेश
शुक्रबार, पुस ६, २०८० 0८:३२
प्रदेशका कुनै मन्त्री तथा सांसदहरु सहभागी नगराउन आग्रह
अध्यक्ष प्रचण्डको कार्यक्षेत्र मिक्लाजुङ–५ परेको थियो
प्रदेश नं १ पुनः नामांकन संयुक्त संघर्ष समिति मोरङले दाहालको कार्यक्रममा कुनै अवरोध नगर्ने
बिर्तामोड । प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल (प्रचण्ड)ले आज मोङको मिक्लाजुङमा आयोजित कार्यक्रमलाई सम्बोधन गर्दैछन् । जनतासँग माओवादी विशेष रुपान्तरण अभियानअन्तर्गत अध्यक्ष दाहाल आज मिक्लाजुङ–५ स्थित खोलीखेलको खेल मैदानमा आउन लागेका हुन् ।
कार्यक्रममा सहभागी हुन प्रचण्ड बिहीबार नै बिराटनगर आइसकेका छन् । उनी कान्छी छोरी गंगा दाहालको घरमा बसेका छन् । प्रचण्डले आज १० बजे मिक्लाजुङमा आयोजित सभालाई सम्बोधन गर्नेछन् ।
नेकपा माओवादी केन्द्रले ‘घरघरमा माओवादी, जनजनमा माओवादी’ भन्ने मुल नाराका साथ केन्द्रदेखि पालिका स्तरसम्मका सबै नेताहरुलाई अन्तरपालिका अभियानमा खटाएको छ । सबै प्रदेशको एउटा एउटा वडामा जाने कार्यक्रम अन्तर्गत अध्यक्ष प्रचण्डको कार्यक्षेत्र मिक्लाजुङ–५ परेको थियो ।
यसैबिच यसैबीच प्रदेश नं १ पुनः नामांकन संयुक्त संघर्ष समिति मोरङले दाहालको कार्यक्रममा कुनै अवरोध नगर्ने जनाएको छ । समितिले एक विज्ञप्ति जारी गरी प्रधानमन्त्री सहभागी कार्यक्रममा कुनै अवरोध नगर्ने तर प्रदेशका कुनै मन्त्री तथा सांसदहरु सहभागी नगराउन आग्रह गरेको छ ।
अध्यक्ष प्रचण्ड मिक्लाजुङको कार्यक्रमलाई सम्बोधन गरेर बिराटनगरमा शुरु हुन लागेको ट्रेड एक्स्पो उद्घाटनमा जाने कार्यक्रम रहेको छ ।
