‘ह्रस्वदीर्घ’ फिल्ममा संचिता लुइँटेललाई देख्न पाइने

• ‘ह्रस्वदीर्घ’मा कलाकारको ‘लाइनअप’ बलियो
• यो साताबाट छायांकन सेट ज्वाइन गर्ने
• फेब्रुअरी अन्त्यमा भारतको मुम्बईमा छायांकन गर्ने

काठमाडौं ।।

चन्द्र पन्तको निर्देशनमा बनिरहेको फिल्म ‘ह्रस्वदीर्घ’मा कलाकारको ‘लाइनअप’ बलियो देखिएको छ । नाम चलेका नेपाली र भारतीय कलाकारको ‘पल्टन’ यो फिल्ममा देखिन्छ । निर्माताले सोमबार थप चारजना चर्चित कलाकारको नाम घोषणा गरेका छन् जसले यो साताबाट छायांकन सेट ज्वाइन गर्नेछन् । निर्देशक पन्तका अनुसार संचिता लुइँटेल, प्रशान्त ताम्राकार, किरण केसी, बुद्धि तामाङ पनि फिल्ममा अनुबन्धित भएका छन् । फिल्ममा यसअघि नै ‘गजनी’ अभिनेता प्रदीप रावतदेखि नेपाली कलाकारहरु सरोज खनाल, बिपना थापाजस्ता चलेका नामहरु जोडिएका छन् ।

‘सकेसम्म सानो रोलमा पनि नाम चलेका कलाकारलाई जोडौं भन्ने हाम्रो उद्देश्य हो’ कास्टिङबारे निर्देशक पन्तले भने । यो फिल्मबाट डेढ दशकपछि बिपनाले पुनरागमन गर्दैछिन् । उनको भागको छायांकन केही दिनमा हुनेछ । बलिउड अभिनेता रावत पनि केही दिनमा नेपाल आउँदैछन् । फिल्मको दोस्रो चरणको छायांकन एक महिनासम्म नवलपरासी, चितवन र सौराहामा चल्ने जनाइएको छ । तेस्रो चरणको छायांकन फेब्रुअरी अन्त्यमा भारतको मुम्बईमा गर्ने योजना छ । अभिनेता नीता ढुंगानाको फिल्म कम्पनी नीता ढुंगाना फिल्म्सको ब्यानरमा यो फिल्मको सुटिङ भैरहेको छ । यो फिल्मलाई हलसँगै चर्चित भारतीय ओटीटी प्लेटफर्ममा रिलिज गर्ने निर्माताको तयारी छ ।

• संसद विघटन