पाथिभरा(मुकुम्लुङ)मा केबलकार राख्न नहुने भन्दै प्रदर्शन
साझा परिवेश
सोमवार, माघ १५, २०८० १८:४४
गणेश कुमार श्रेष्ठ
ताप्लेजुङको पाथिभरा(मुकुम्लुङ)मा केबलकार राख्न नहुने भन्दै सोमबार फुङलिङ बजारमा प्रदर्शन भएको छ ।
केबलकार निर्माणले सो क्षेत्रको बन जंगल विनास हुने तथा पर्यावरणमा असर पुग्ने र प्रसिद्ध धार्मिक स्थल डेटिङ स्पटमा परिणत हुने, मुन्धुमी स्थलको अतिक्रमण हुने जस्ता तर्क अगाडि सारिएको छ ।
मुकुम्लुङ संघर्ष समिति, केबलकार खारेजी संघर्ष समिति, किराँत याक्थुङ चुम्लुङ, प्रदेश १ पुनः नामाङ्कन संयुक्त संघर्ष समिति, किराँत धर्म तथा साहित्य उत्थान संघ, पहिचानका लागि युवा समिति लगायतका संघ संस्थाहरुको संलग्नतामा उक्त प्रदर्शन भएको थियो ।
प्रदर्शनमा हरियो वन नेपालको धन, मुकुम्लुङ बचाऔं, विकासको नाममा पवित्र धार्मिक स्थल व्यापारिक केन्द्र बनाउन पाइन्दैन, मुकुम्लुङ क्षेत्रमा केबलकार चाहिंदैन जस्ता कार्डहरु प्रयोग गरिएको थियो ।
उता पाथिभरा(मुकुम्ल्ङ) केबलकार निर्माण कम्पनीका अध्यक्ष चन्द्र ढकालले सहज बातावरण बने १३ महिनामा केबलकार निर्माण सम्पन्न गरिसक्ने जनाएका छन् ।
