मोरङ – मोरङको बुढीगंगा गाउँपालिकामा एक महिलाको शव गाई गोठमा फेला परेको छ।
जिल्ला प्रहरी कार्यालय मोरङका अनुसार बुढीगंगा गाँउपालिका–२ अमाहीस्थित स्थानीय नरसिंह चौधरीको गाई गोठमा २८ वर्षीया प्रियंका सुनारको शव बोरामा बाँधेर राखिएको अवस्थामा फेला परेको हो।
मोरङ प्रहरीका प्रवक्ता प्रहरी नायब उपरीक्षक टीकाबहादुर कार्कीले विराटनगर महानगरपालिका–१९ की बासिन्दा सुनारको शव सोमबार दिउँसो फेला परेको हो। प्लाष्टिकको बोरामा गुन्टो पारेर शव फालिएको अवस्थामा फेला परेको बताएका मोरङ प्रहरी प्रवक्ता कार्कीले घटनाबारे विभिन्न कोणबाट अनुसन्धान सुरु गरिएको जानकारी दिए।
सुनारको हत्या गरी फालिएको हुनसक्ने कार्कीले बताए। उनका अनुसार शवमा चोट देखिएको छ। शव फेला परेसँगै प्रहरीले अनुसन्धानका क्रममा कटहरी गाउँपालिका–५ का ६२ वर्षीय रामानन्द राम र विराटनगर–१९ का २९ वर्षीय रमेश साहलाई पक्राउ गरेको कार्कीले जानकारी दिए।
घटनामा संलग्न भए नभएकोबारे अनुसन्धानका लागि दुवै जनालाई पक्राउ गरिएको कार्कीले बताए। हाल शव पोस्टमार्टमका लागि कोशी अस्पतालमा राखिएको जानकारी दिए।
