‘सकम्बरी’ गीतकी मोडल भन्छिन्- अब फिल्ममा काम गर्ने चाहना छ

काठमाडौं । गायक प्रकाश सपुतको गीत ‘सकम्बरी’लाई लिएर यतिबेला चर्चा र विवाद दुवै भइरहेको छ । यसको केन्द्रमा छिन् मोडल कुसुम शर्मा पनि । पेशाले नर्स उनलाई पहिलो गीतले नै लाइमलाइटमा ल्याइदियो । गीतिकथा शैलीमा तयार पारिएको यो गीतमा कुसुमले शीर्ष भूमिका निर्वाह गरेकी छन् ।

विपन्न गाउँले परिवारबाट मोडल बन्ने र पैसा कमाउने सपनासहित सहर आइपुगेकी युवतीको भूमिकामा उनी देखिएकी छन् । गीतले निकै चर्चा पाइरहँदा अनलाइनखबरसँग कुरा गर्दै कुसुमले केही अनुभव बाँडेकी छन् । गीतले गलत सन्देश दिएर छोरीलाई गलत देखाउन नखोजेको उनको तर्क छ ।

भन्छिन्, ‘छोरी मान्छेलाई जति दोषी देख्छौं, त्यत्तिकै रेस्पोन्सिबल छोरा मान्छे पनि हुन्छ है भनेर सन्देश दिन खोजेका हौं । कतिपय कुराहरु काल्पनिक पनि हुन्छ्न, तोकेर भनेको पनि होइन । त्यही पनि यो समाजमा घटिरहेको घटना हो नि, होइन र ? पुरुषहरुले कति दमन गरेका छन् र महिलाहरु कसरी बाध्य हुन्छन् भन्ने कुरालाई चित्रण गरिएको हो ।’

गीत रिलिज भएपछि केहीले आफूलाई गाली गरेको अनुभव उनले सुनाइन् । ‘सबै मान्छेको विचार एउटै पनि हुँदैन । धेरैले राम्रो भनिदिनुभएको छ । अभिनय हो, साँचो कुरा प्रस्तुत गर्दा केको डर जस्तो कुरा गर्दिनुभएको छ । थोरैको गालीभन्दा धेरैको माया पाएकी छु । मायाले खिच्दो रहेछ,’ उनले भनिन् ।

गीत रिलिज हुँदा सुरुमा परिवारले पनि असहज मानेको तर प्रतिक्रिया सकारात्मक आउन थालेपछि परिवारको सहयोग मिलेको उनले बताइन् । ‘टिकटकमा छोटो क्लिप्स हेर्दा जसलार्ई पनि नराम्रो लाग्छ । सुरुमा त परिवारले यो के गरी भन्नुभएको थियो,’ उनी भन्छिन्, ‘सबैले राम्रो भनेको देख्दा एकदमै खुसी हुनुहुन्छ । कमेन्ट पढेर ममी खुसी हुनुभएको छ, अरुले जेसुकै भनोस्, हाम्रो बच्चा कस्तो छ भन्ने हामीलाई थाहा छ भनेर भन्नुभएको छ । तिम्रो खुसीमा हामी खुसी छौं, अरुको कुरा नसुन भन्नुभएको छ । अनि अरु के चाहियो मलाई ?’

आफू नर्सिङको विद्यार्थी भएकाले विदेश जाने तयारीमा रहेको समेत उनले बताइन् । ‘म नर्सिङ पढिरहेकी थिएँ । नर्सिङ पास गरेर बाहिर जाने तयारीमा थिएँ । अब हेरुम के हुन्छ । बलिरहेको दियो झ्याप्प पनि निभ्छ । आफ्नो साइडमा एउटा ब्याकअप राखेकी छु,’ कुसुम भन्छिन् । सकम्बरी रिलिजसँगै गीतको अफर पनि आउन थालेको उनले बताइन् । गीतको छायांकन गर्दा पर्दा पछाडिका मान्छेको मेहनतले आफू प्रभावित भएको सुनाइन् । ‘पर्दा पछाडिका मान्छेले कति दुःख गर्नुपर्दो रहेछ भन्ने दुःख बुझेकी छु । यो कुरा मलाई थाहा थिएन,’ उनले भनिन् ।

गीत हिट भएपछि कमैले आफूलाई कुसुम भनेर चिन्ने गरेको तर सकम्बरी भनेर सबैले चिन्न थालेको अनुभव उनले सुनाइन् । ‘मेरो नाम नै ओझेलमा परेको छ यतिबेला,’ उनले भनिन्, ‘सबैले सकम्बरी भनेर चिन्न थाल्नुभएको छ ।’ खासमा सपुतका कान्छा भाइ सुनिलमार्फत यो म्युजिक भिडियो उनले हात पारेकी हुन् । केही वर्ष पहिले सुनिल र कुसुम फेसबुकमा साथी बनेका थिए । उनले फेसबुकमा हालिरहने फोटो देखेर सुनिलले उनलाई म्युजिक भिडियोको लागि प्रस्ताव राखेका थिए ।

आफ्नो पर्सनालिटी ‘म्याच’ हुने देखेर अफर स्वीकारेको उनको भनाइ छ । अब म्युजिक भिडियोपछि फिल्ममा समेत अभिनय गर्ने कुसुमको सोच छ । ‘अब प्रेमकथा, सामाजिक र अर्गानिक कथाका फिल्ममा काम गर्छु,’ उनले भनिन्, ‘चिसो मान्छे, बुलाकीजस्ता फिल्महरु गर्न मन छ ।’ प्रियंका कार्कीबाट आफूलाई अभिनयमा आउने प्रेरणा मिलेको बताउने कुसुम स्वस्तिमा खड्का र पूजा शर्मा फेभरेट अभिनेत्री भएको बताउँछिन् । ‘मेरो विचारमा प्रियंका बोल्ड छिन्, केही गर्नको लागि उनी अमेरिकाबाट नेपाल आएकी हुन्,’ उनी भन्छिन् ।

पर्वतमा जन्मिएकी कुसुमको परिवार नवलपरासीको दुम्कीबासमा बस्दै आएको छ । चितवनको कालिका मेडिकल इन्सिटच्युटबाट नर्सिङ अध्ययन सकेर उनी गत असारदेखि काठमाडौंमा बस्दै आएकी छन् ।

• संसद विघटन