सरकारले चालु आर्थिक वर्षको असारभित्र परियोजना लागु गर्ने
विस्तृत परियोजना प्रतिवेदन (डीपीआर) नसकेका स्थानीय तहलाई
आधारभूत अस्पताल निर्माणको अनुमति नदिने
स्थानीय तहमा ५, १० र १५ शय्या
अस्पताल निर्माणको कार्यक्रममा नयाँ रणनीति
हालसम्म ५१३ वटाको डीपीआर तयार भएको
सरकारले चालु आर्थिक वर्षको असारभित्र विस्तृत परियोजना प्रतिवेदन (डीपीआर) नसकेका स्थानीय तहलाई आधारभूत अस्पताल निर्माणको अनुमति नदिने भएको छ । प्रत्येक स्थानीय तहमा ५, १० र १५ शय्याको आधारभूत अस्पताल निर्माणको कार्यक्रममा नयाँ रणनीति लिएको हो ।
बुधबार बसेको संसद्को शिक्षा स्वास्थ्य तथा सूचना प्रविधि समितिको बैठकमा स्वास्थ्य तथा जनसंख्या मन्त्रालयका सचिव डा. रोशन पोख्रेलले आगामी आर्थिक वर्षदेखि आधारभूत अस्पतालको संख्या नबढाइने बताए ।
सरकारले आधारभूत अस्पताल नभएका ६५५ पालिकामा ५, १० र १५ शय्याका अस्पताल बनाउने लक्ष्य लिएको थियो । सोहीअनुसार दुई वर्षभित्र निर्माण सम्पन्न गर्ने गरी २०७७ सालमा एकैपटक ३९६ वटा आधारभूत अस्पतालको शिलान्यास गरिएको थियो ।
तीमध्ये हालसम्म ५१३ वटाको डीपीआर तयार भएको छ । ४१४ वटाले निर्माणका लागि बजेट पाएको र २० वटा मात्रै निर्माण सम्पन्न भइसकेको मन्त्रालयको तथ्यांक छ । सरकारले निर्माणाधीन अस्पताल सम्पन्न गर्न आगामी आर्थिक वर्ष २०८०-०८१ का लागि आठ अर्ब रुपैयाँ बजेट विनियोजन गरेको छ ।
