टिकेट दर डिजिटल बनाउन १७ हलहरुलाई महानगरको निर्देशन
साझा परिवेश
मङ्लबार, असार १९, २०८० १६:३३
फिल्म हललाई शुल्क समावेश गरेर ३० दिनभित्र डिजिटल बनाउन निर्देशन
१७ हलसहित भृकुटीमण्डपको फनपार्कलाई समेत पत्र काटियो
काठमाडौं ।।
काठमाडौं महानगरपालिकाले महानगर क्षेत्रभित्र सञ्चालनमा रहेका १७ वटा फिल्म हललाई मनोरञ्जन शुल्क समावेश गरेर ३० दिनभित्र डिजिटल प्रणाली सञ्चालनमा ल्याउन निर्देशन दिँदै पत्र काटेको छ ।
फिल्म हलको टिकट डिजिटल प्रणालीमा लैजान र महानगरपालिकालाई पनि पहुँच दिन महानगरले भनेको हो । मनोरञ्जन करका करदाताले डिजिटल प्रणालीबाट प्रवेश शुल्क संकलन गरेको भए ३ दिनभित्र त्यसमा महानगरलाई पनि पहुँच दिन भनिएको छ ।
यस्तै डिजिटल प्रणालीमा कर सञ्चालन नगरेकाहरुले भने पत्र प्राप्त भएको मितिले ३० दिनभित्र प्रवेश शुल्क डिजिटल प्रणालीमा ल्याइ उक्त प्रणालीमा महानगरको राजस्व विभागलाई पहुँच दिलाउन पत्रमा भनिएको छ । १७ हलसहित भृकुटीमण्डपको फनपार्कलाई समेत पत्र काटिएको छ ।
