साढे २ करोड बुझाएर मीनबहादुर छुटे, ७ लाख बुझाउन नसक्दा अरूणकुमार जेल मै….
साझा परिवेश
सोमवार, भदौ २५, २०८० १४:४५
धरौटी तिर्न नसकेपछि एक जना अभियुक्त कारागार चलान
अदालतले श्रेष्ठसँग सात लाख ५० रुपैयाँ धरौटी माग्यो
सबैभन्दा धेरै धरौटी बुझाउनुपर्ने मीनबहादुर गुरुङ पनि आइतबार नै छुटे
काठमाडौं ।।
ललिता निवास प्रकरणमा धरौटी तिर्न नसकेपछि एक जना अभियुक्त कारागार चलान भएका छन्। नापी कार्यालय मैतिदेवी काठमाडौंका तत्कालीन अमिन अरूणकमार श्रेष्ठ कारागार चलान भएका हुन्। उनी केन्द्रीय कारागार जगन्नाथदेवलमा चलान भएका छन्। अदालतले श्रेष्ठसँग सात लाख ५० रुपैयाँ धरौटी माग गरेको थियो।
काठमाडौं जिल्ला अदालतका न्यायाधीश भोलानाथ ढकालको इजलासले ललिता निवास प्रकरणमा पक्राउ परेका १८ जनालाई नै रिहा गर्न आइतबार आदेश दिएको थियो। अदालतले एक जनालाई साधारण तारेख र १७ जनासँग धरौटी माग गरेको थियो ।
जसमध्ये १६ जना धरौटीमा रिहा भइसकेका छन् । अदालतले प्रकरणका मुख्य योजनाकार मानिएका भाटभटेनी सुपरमार्केटका सञ्चालक मीनबहादुर गुरूङसँग दुई करोड ४६ लाख धरौटी माग गरेको थियो। अन्यसँग एक लाखदेखि १५ लाख रुपैयाँसम्म व्यक्तिअनुसार बेग्ला–बेग्लै धरौटी माग गरेको थियो । सबैभन्दा धेरै धरौटी बुझाउनुपर्ने मीनबहादुर गुरुङ पनि आइतबार नै छुटिसकेका छन् । आइतबार नै धरौटी रकम बुझाएर गुरुङ रिहा भएका थिए ।
