कोशी प्रदेश सरकारले विश्वासको मत लिनुअघि अध्यादेशको बजेट पास गर्ने तयारी गरेको छ । हिक्मतकुमार कार्की नेतृत्वको कोशी प्रदेश सरकारले विश्वासको मत अगाडि नै बजेट पास गर्न प्रयास गर्ने तयारी गरेको हो ।
सरकारको भविश्य अनिश्चित रहेकोले प्रदेशलाई बजेट होलिडेको अवस्थामा पुग्न नदिने बजेटमा सहमति जुटाउने प्रयास भइरहेको एमाले प्रमुख सचेतक रेवतीरमण भण्डारीले जानकारी दिए ।
गत जेठ ३१ गते सरकारले ल्याएको अध्यादेशको प्रतिस्थापन विधेयक पारित नहुँदा भदौ १० गतेदेखि भदौ २४ गतेसम्म प्रदेश बजेटविहिन भएको थियो । उद्धब थापा नेतृत्वको सरकारलाई सर्वोच्च अदालतले बर्खास्त गरेपछि मुख्यमन्त्री नियुक्त भएका कार्की नेतृत्वको सरकारले भदौ २४ गते अध्यादेशबाटै दोस्रो बजेट जारी गरेको थियो ।
अध्यादेशबाट आएको बजेट प्रदेशसभबाट प्रतिस्थापन गर्नुपर्ने भएकोले केही दिनभित्रै प्रदेशसभाको चौथो अधिवेशन बोलाउने तयारीमा सरकार रहेको भण्डारीले जानकारी दिए । यसअघि आएको बजेटमा उद्धब थापा नेतृत्वको सरकारले तयार गरेको प्रतिस्थापनसमेतलाई समेटेर नयाँ प्रतिस्थापन बिधेयक बनाउने तयारीमा सरकार रहेको उनले बताए ।
‘सरकारको आयु अनिश्चित रहेकोले बजेटलाई पहिलो प्राथमिकता दिन खोजिएको छ’ उनले भने, ‘सरकारको टुंगो नरहेकोले सबै दलको सहमतिमा बजेट पारित गर्ने प्रयास रहेको छ ।’ उनले यसअघिको सरकारले तयारी गरेको प्रतिस्थापन बिधेयकका कार्यक्रमलाई पनि समेटेर जान आफूहरु तयार रहेको भन्दै त्यसको लागि छलफल गर्ने बताए ।
निवर्तमान मुख्यमन्त्री उद्धव थापा नेतृत्वको सरकारले प्रदेशसभा सचिवालयमा दर्ता गराएको प्रतिस्थापन विधेयकमा समावेश भएका विषयलाई पनि समेटेर नयाँ प्रतिस्थापन विधेयक लैजाने र सदनबाट सर्वसम्मत पारित गर्ने योजना सरकारले बनाएको उनले बताए । उद्योग, कृषि तथा सहकारी मन्त्री पाँचकर्ण राईले भने विश्वासको मत लिएर बजेट प्रतिस्थापन गरिने बताएका छन् ।
संविधानको व्यवस्था अनुसार सरकारले ल्याएका अध्यादेशहरु जारी भएपछि पहिलो पटक बसेको संसद बैठकमा टेबल गर्नुपर्छ । टेबल गरेको ६० दिनभित्र प्रतिस्थापन विधेयक मार्फत प्रतिस्थापन गर्न नसके उक्त अध्यादेश स्वतः निस्क्रिय हुनेछ ।
