एसीसी यू–१९ एसिया कपमा अफगानिस्तानविरुद्ध बलिङमा नेपालले उत्कृष्ट सुरुआत गरेको छ । दुबईस्थित आईसीसी एकेडेमी ओभल–२ मा टस जितेर फिल्डिङ गरिरहेको नेपालले पहिलो १० ओभरमा अफगानिस्तानको तीन विकेट लिएर खेलमा पकड बनाएको छ । १० ओभरको समाप्तिमा अफगानिस्तानले तीन विकेट गुमाएर ४४ रन बनाएको छ । नेपालका लागि गुल्सन झाले पहिलो विकेट दिलाएका थिए । त्यसपछि नेपालका हेमन्त धामीले दुई विकेट लिए ।
प्रतियोगिताको सेमिफाइनल पुग्ने सम्भावनालाई कायम राख्न आज नेपाललाई जित्नै पर्ने दबाब छ । दुवै टिम आज पहिलो जितको खोजीमा छन् । यसअघि प्रतियोगिताको पहिलो खेलमा नेपाल पाकिस्तानसँग सात विकेटले पराजित भएको थियो । यस्तै, अफगानिस्तान पनि पहिलो खेलमा भारतसँग सात विकेटले नै पराजित भएको थियो । नेपालले समूह चरणको अन्तिम खेलमा मंसिर २६ गते मंगलबार भारतसँग खेल्नेछ । आईसीसी एकेडेमी ओभर–२ मा हुने यो खेल बिहान ११ः१५ बजेदेखि सुरु हुनेछ ।
समूह ‘ए’ मा नेपालबाहेक बाँकी तीन वटै देशले आईसीसीबाट टेस्ट राष्ट्रको मान्यता पाएका छन् । समूहका शीर्ष दुई टिमले सेमिफाइनलमा स्थान बनाउनेछन् । दुवै सेमिफाइनल खेल मंसिर २९ गते हुनेछ । प्रतियोगिताको फाइलन खेल दुबई अन्तर्राष्ट्रिय क्रिकेट मैदानमा पुस १ गते हुनेछ । गत अक्टोबरमा भएको छनोटबाट नेपाल, यूएई र जापानले शीर्ष तीन स्थान हासिल गर्दै एसिया कपमा स्थान बनाएका हुन् । नेपाल प्रिमियर कपको विजेता, यूएई उपविजेता र जापानले तेस्रो स्थान सुरक्षित गर्दै यूएईको टिकट काटेका थिए ।
