काठमाडौँ । आगामी सिजनको इन्डियन प्रिमियर लिग (आईपीएल) र पाकिस्तान सुपर लिग (पीएसएल) दुवै विदेशी फ्रेन्चाइज क्रिकेट प्रतियोगितामा नेपाली खेलाडीलाई मैदानमा देख्न नपाइने भएको छ । पीएसएलको बुधबार राति सम्पन्न ‘ड्राफ्ट’ मा कुनै पनि नेपाली खेलाडी बिकेनन् ।.
आगामी सिजनको पीएसएलका लागि १० जना नेपाली खेलाडीले नाम दर्ता गराएका थिए । नेपालका चर्चित लेग–स्पिनर सन्दीप लामिछाने ‘प्लाटिनम’ समूहमा थिए । उक्त समूहमा रहेका खेलाडीलाई यदि कुनै क्लबले खरिद गरेको भए सबैभन्दा बढी रकम प्राप्त गर्ने थिए ।
तर, यसपटक सन्दीप पनि पीएसएलमा कुनै क्लबको रोजाइमा परेनन् । सन्दीपले यसअघि नै पीएसएल खेलिसकेका खेलाडी हुन् । यसपटक ‘डायमन्ड’ समूहमा नेपालका कुनै पनि खेलाडी सहभागी थिएनन् । ‘गोल्ड’ समूहमा भने नेपालबाट गुल्सन झाको नाम दर्ता भएको थियो ।
नेपालबाट ‘सिल्भर’ समूहमा सबैभन्दा बढी खेलाडीले नाम दर्ता गराएका थिए । उक्त समूहमा नेपालबाट आरिफ शेख, आसिफ शेख, अर्जुन साउद, यू–१९ टोलीका कप्तान देब खनाल, दीपेन्द्रसिंह ऐरी, कुशल भुर्तेल, कुशल मल्ल र सोमपाल कामीको नाम दर्ता रहेको थियो ।
तर, यसपटक कुनै पनि नेपाली खेलाडी पीएसएल क्लबहरुको रोजाइमा परेनन् । पीएसएलको ‘ड्राफ्ट’ लाहोरस्थित राष्ट्रिय क्रिकेट एकेडेमीमा भएको थियो । यसपटक पीएसएलमा २२ राष्ट्रका चार सय ८५ जना खेलाडीले आफ्नो नाम दर्ता गराएका थिए । पीएसएलको आगामी संस्करण सन् २०२४ को फेब्रुअरी १३ देखि मार्च १८ सम्म आयोजना हुँदैछ
यसअघि आगामी सिजनको इन्डियन प्रिमियर लिग (आईपीएल) का लागि पनि नेपाली खेलाडीहरुले आफ्नो नाम दर्ता गराएका थिए । तर, आईपीएलका कुनै पनि खेलाडीलाई ‘अक्सन’ का लागि अन्तिम सूचिमा समावेश गरिएन् । सन् २०२४ मा आयोजना हुने आईपीएलको ‘अक्सन’ डिसेम्बर १९ तारिखमा दुबईमा हुँदैछ । यसअघि भने नेपाली खेलाडी सन्दीप लामिछानेले आईपीएल खेलिसकेका छन् ।
