रेफ्रीमाथि मुक्का प्रहार गर्ने अध्यक्ष फारुक कोकालाई आजीवन प्रतिबन्ध
मुक्का प्रहार गरेपछि रेफ्री हालि उमल मेलेर मैदानमै लडे
सबै खेलहरू सोमबारदेखि अनिश्चितकालका लागि बन्द
काठमाडौं ।।
रेफ्रीमाथि मुक्का प्रहार गर्ने टर्कीस फुटबल लिगको क्लब एमकेइ अन्कारागुकुका अध्यक्ष फारुक कोकालाई आजीवन प्रतिबन्ध लगाइएको छ । सोमबार टर्किस लिगअन्तर्गत रिजेसपोरविरुद्धको खेल बराबरीमा टुंगिएपछि अन्कारागुकुका अध्यक्ष कोकाले मैदानमै प्रवेश गरेर रेफ्रीमाथि मुक्का प्रहार गरेका थिए । खेलको ९७औँ मिनेटमा रिजेसपोरले बराबरी गोल फर्काएसँगै फिफा रेफ्री हालि उमल मेलेरले अन्तिम ह्विसिल बजाएका थिए । त्यसपछि मैदानमा प्रवेश गरेर कोकाले मुक्का प्रहार गर्दा रेफ्री हालि उमल मेलेर मैदानमै लडेका थिए । अध्यक्ष कोकालाई २० लाख लिरा (५४ हजार पाउन्ड) जरिबाना समेत गरिएको छ ।
यस्तै, अन्कारागुकुले अबका पाँच खेल घरेलु मैदानमा समर्थकबिना नै खेल्नुपर्नेछ । रेफ्रीमाथिको आक्रमणपछि टर्कीस लिगका सबै खेलहरू सोमबारदेखि अनिश्चितकालका लागि बन्द गरिएको छ । तर, शुक्रबार टर्कीको फुटबल संघले लिग आगामी मंगलबारदेखि सुरु हुने भएको छ । कोकाको प्रहारबाट मैदानमा लडेका मेलेरलाई अन्य केही समर्थकले समेत प्रहार गरेका थिए । ३७ वर्षीय मेलेर टर्कीका शीर्ष रेफ्रीमध्येका एक हुन् र उनीसँग फिफा रेफ्री ब्याच छ । उनी यूईएफए इलाइट रेफ्रीको सूचीमा समेत छन् ।
