सुरक्षण मुद्रणमा ४० करोड बढी भ्रष्टाचार, विकल पौडेलसहित ६ जनाविरुद्ध मुद्दा

अख्तियार दुरुपयोग अनुसन्धान आयोगले सुरक्षण मुद्रण केन्द्रका तत्कालीन कार्यकारी निर्देशक विकल पौडेल, राष्ट्रिय सूचना प्रविधि केन्द्रका तत्कालीन निर्देशक सफल श्रेष्ठसहित ६ जनाविरुद्ध भ्रष्टाचार मुद्दा दायर गरेको छ।

सुरक्षण प्रेसको सफ्टवेयर तथा अन्य उपकरण खरिदमा भ्रष्टाचार गरेको भन्दै अख्तियारले पौडेलसहित ६ जनाविरुद्ध आइतबार विशेष अदालतमा मुद्दा दायर भएको हो। विकलविरुद्ध तेस्राे पटक भ्रष्टाचार मुद्दा दायर भएकाे हाे।

सुरक्षण प्रेसको सफ्टवेयर तथा अन्य उपकरण खरिदको लागि बोलपत्र आह्वान गर्दा सार्वजनिक खरिद सम्बन्धी प्रचलित कानुनबमोजिम हुनुपर्नेमा केही सीमित व्यक्ति विशेष वा कम्पनीसँग मिल्ने गरी तथा स्वस्थ प्रतिस्पर्धा नहुने गरी भएकोले नेपाल सरकारको सम्पत्ति गैरकानूनी तवरले हानिनोक्सानी तथा सरकारी रकमको दुरुपयोग गरेको अख्तियारले जनाएकाे छ।

पौडेल र श्रेष्ठसहित वन तथा वातावरण मन्त्रालयका तत्कालीन सिडिई (मेकानिकल) नविनकुमार पोखरेल, सुरक्षण मुद्रण केन्द्रका तत्कालीन लेखा अधिकृत खड्क बहादुर थापा, शाखा अधिकृत हरिवल्लभ घिमिरे र म्याक्स इन्टरनेशनल तथा उक्त कम्पनीको सीईओ अकबर हुसेनलाई प्रतिवादी बनाइएको छ।

उनीहरूले सुरक्षण मुद्रणकाे ४० करोड ८५ लाख रूपैयाँ भ्रष्टाचार गरेको आयोगका प्रवक्ता नरहरि घिमिरेले जानकारी दिए।

उनीहरूमाथि भ्रष्टाचार निवारण ऐन, २०५९ को दफा ८ को उपदफा (१) को देहाय (क), (घ) र (च) बमोजिमको कसुरमा ४० करोड ८५ लाख ७४ हजार ७ सय ४० रुपैयाँ बिगो कायम गरी कैद सजाय माग गरिएकाे अख्तियारले उल्लेख गरेकाे छ।

• संसद विघटन