सुन चाँदीका गहना सफा गर्ने भन्दै ठगी गर्ने ३ जना पक्राउ

ओखलढुंगा । सुन चाँदीका गहना सफा गरिदिने बाहनामा ठगी गर्ने ३ जना पक्राउ परेका छन् । जिल्लाको मोलुङ गाउँपालिका–२ स्थित गाउँमा सर्वसाधारणका गहना सफा गरिदिने भन्दै ठगी गर्ने उनीहरुलाई स्थानीयकै सुचनाको आधारमा प्रहरीले पक्राउ गरेको हो ।

पक्राउ पर्नेमा २ जना भारतीय र १ जना नेपाली रहेको प्रहरीले जनाएको छ । प्रहरीका अनुसार पक्राउ पर्नेमा मोरङको विराटनगर महानगरपालिका–११ का ४४ वर्षीय राजेश शाह, भारतका अरअरिया जिल्ला फरविसगंजका ४४ वर्षीय सुनिल मण्डल र भारतकै अरअरिया जिल्ला पञ्चायत ढोलबजिया बस्ने ४३ वर्षीयय पारसकुमार दास रहेका छन् ।

उनीहरुले गाउँलेहरुलाई सुन चाँदीका गहना सस्तो मूल्यमा सफा गरिदिन्छौँ भन्दै प्रलोभनमा पार्ने र सफा गर्न दिएपश्चात विभिन्न किसिमको रासायनिक पदार्थ प्रयोग गरेर गहनाहरुको वास्तविक तौल नै कम गरी ठगी गरेको पाइएको प्रहरीले जनाएको छ ।

ठगीको जानकारी पाइएपछि स्थानीय जनप्रतिनिधिको सहयोगमा उनीहरुलाई गाउँबाटै पक्राउ गरिएको जिल्ला प्रहरी कार्यालय ओखलढुंगाका प्रहरी निरीक्षक विकास राईले जानकारी दिए । पक्राउ परेका उनीहरुबाट प्रहरीले विभिन्न औजार र रासायनिक पदार्थसमेत बरामद गरेको छ ।

पक्राउ परेका उनीहरुमाथि थप अनुसन्धान भइरहेको जिल्ला प्रहरी कार्यालय ओखलढुंगाले जनाएको छ ।

• संसद विघटन