रवि लामिछानेमाथि मुद्दा नचलाउने महान्यायाधिवक्ताको निर्णयविरुद्ध रिट लैजाने तयारी
साझा परिवेश
आइतवार, चैत्र १२, २०७९ १५:५४
काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेमाथि राहादनीसम्बन्धी मुद्दा नचलाउने निर्णयविरुद्ध रिट लैजाने तयारी गरिएको छ । उनको सांसद पदको योग्यतासम्बन्धी रिट दायर गरेका युवराज पौडेल (सफल) महान्यायाधिवक्ताको निर्णयविरुद्ध सर्वोच्च अदालत जाने तयारी गरेका हुन् ।
यसअघि, अमेरिकी नागरिक रहँदै नेपाली राहदानी प्राप्त गरी दुरुपयोग गरेको भन्दै लामिछानेविरुद्ध अनुसन्धान गरिएको थियो । गएको फागुनमा प्रहरीले अनुसन्धान सकी लामिछानेविरुद्ध मुद्दा दायर गर्नु नपर्ने रायसहितको प्रतिवेदन जिल्ला सरकारी वकिल कार्यालय काठमाडौंमा बुझाएको थियो ।
सोहीअनुसार जिल्ला सरकारी वकिल कार्यालयले उनीविरुद्ध मुद्दा नचलाउने निर्णय गरेको थियो । त्यसको जानकारी उच्च सरकारी वकिल कार्यालय पाटनलाई गराइएको थियो । उच्चले समेत लामिछानेविरुद्ध मुद्दा नचलाउने निर्णय गर्यो ।
सो निर्णय महान्यायाधिवक्ता कार्यालयलाई जानकारी गराइयो । महान्यायाधिवक्ता कार्यालयले पनि लामिछानेविरुद्ध मुद्दा चलाउनु नपर्ने निर्णय गरेको थियो । अमेरिकी नागरिक रहँदा नेपाली राहदानी प्राप्त गरे पनि त्यसको प्रयोग नगरेको मुख्य आधार लिँदै महान्यायाधिवक्ता कार्यालयले मुद्दा चलाउनु नपर्ने निर्णय गरेको थियो ।
महान्यायाधिवक्ता कार्यालयको निर्णयविरुद्ध सकेसम्म छिटो रिट लैजाने तयारी आफूले गरेको पौडेल बताउँछन् । “महान्यायाधिवक्ता कार्यालयको निर्णयविरुद्ध रिट हामी छिटोभन्दा छिटो लग्ने तयारीमा छौँ,” पौडेलले बाह्रखरीसित भने ।
