नेपाललाई अन्तिम खेलमा नेदरल्यान्ड्सले वेस्ट इन्डिजसँग हार्नुपर्ने समीकरण
समूह ‘ए’ मा नेपालसँगै जिम्बाब्वे, नेदरल्यान्ड्स, वेस्ट इन्डिज र अमेरिका छन्
काठमाडौं ।।
आईसीसी क्रिकेट विश्वकप छनोटको आफ्नो तेस्रो खेलमा नेपालले नेदरल्यान्ड्सविरुद्ध आसिफ शेखलाई पहिलो विकेटको रुपमा गुमाएको छ ।
ताकासिंगा स्पोर्ट्स क्लबमा जारी खेलमा नेपालले २.२ ओभरमा आसिफलाई गुमाएको हो । डक भएका आसिफलाई नेदरल्यान्ड्सका लोगन भान बीकले बोल्ड गरे । नेपालले तीन ओभरको समाप्तिमा एक विकेट गुमाएर आठ रन जोडेको छ ।
नेदरल्यान्ड्सविरुद्ध नेपाल पहिलो ब्याटिङ गर्दै छ । खेलका लागि भएको टस जितेपछि नेदरल्यान्ड्सका कप्तान स्कट एडवार्डसले फिल्डिङको निर्णय गर्दै नेपाललाई ब्याटिङको निम्तो दिएका थिए ।
छनोटको सुपर सिक्समा पुग्न आज नेपाललाई जित्नैपर्ने दबाबमा छ । आजको खेलमा जित निकाले पनि नेपाललाई अन्तिम खेलमा नेदरल्यान्ड्सले वेस्ट इन्डिजसँग हार्नुपर्ने समीकरण आवश्यक हुन्छ ।
जिम्बाब्वेमा जारी छनोट प्रतियोगितामा सहभागी १० टिमलाई दुई समूहमा विभाजन गरिएको छ । समूह ‘ए’ मा नेपालसँगै जिम्बाब्वे, नेदरल्यान्ड्स, वेस्ट इन्डिज र अमेरिका छन् । समूह ‘बी’मा युनाइटेड अरब इमिरेट्स (यूएई), श्रीलंका, स्कटल्यान्ड, आयरल्यान्ड र ओमान छन् ।
