१२ करोडको सीमा हाटउन तयारी गरेसँगै सेयर बजारमा हरियाली छायो
गभर्नर महाप्रसाद अधिकराीले १२ करोडको सीमा हटाउने
काठमाडौं ।।
नेपाल राष्ट्र बैंकले मार्जिन प्रकृतिको सेयर धितो कर्जामा १२ करोडको सीमा हाटउन तयारी गरेसँगै सेयर बजारमा हरियाली छाएको छ । मंगलबार बसेको वित्तीय क्षेत्र उच्चस्तरीय समन्वयन समितिको छलफलमा गभर्नर महाप्रसाद अधिकराीले १२ करोडको सीमा हटाउने बताएका थिए । सेयर लगानीकर्ताले व्यक्तिगत रुपमा १२ करोडको सीमा पर्याप्त रहेपनि सेयर बजारमा लगानी गर्ने उदेश्यले आएका कम्पनीमा उक्त सीमा व्यवहारिक नभएको बताउँदै आएका थिए । सबै क्षेत्रबाट आलोचनको विषय भएपछि १२ करोडको सीमा हटाउन तयारीसँगै सेयर बजारमा हरियाली छाएको हो ।
साताको अन्तिम कारोबार दिन बिहिबार बजार परिसूचक नेप्से ४४.३४ अंकले वृद्धि हुँदा २०२९.७८ को विन्दुमा पुगेको छ । आइतबार ४२.१४ अंकको उच्च गिरावट भएको नेप्से सोमबार र मंगलबार भने बढेको थियो । मंगलबार १९८४.४३ को विन्दुमा बन्द भएको नेप्से बिहीबार २.२३ प्रतिशतले बढेर बन्द भएको हो । हाइड्रोपावर कम्पनीको सेयर मूल्यमा उच्च वृद्धि हुँदा बिहीबार नेप्से पनि बढेको हो । नेप्सेका सबै उपसूचकमा वृद्धि हुँदा हाइड्रोपावर उपसूचक ५.३१ प्रतिशतले बढेको छ । यस्तै वित्त कम्पनी उपसूचक ४.३८ प्रतिशत र विकास बैंक उपसूचक ३.७७ प्रतिशतले वृद्धि भएको हो ।
नेप्सेसँगै कारोबार रकम पनि बढेको छ । गत आइतबार नेप्सेमा उच्च गिरावट भएपनि २ अर्ब नाघेको कारोबार रकम सोमबार १ अर्ब पनि पुगेको थिएन भने मंगलबार मुश्किलले अर्ब नाघेको थियो । तर, बिहीबार भने ३ अर्ब माथिको कारोबार भएको छ । १ लाख १९ हजार ३५९ वटा कारोबारमा १ करोड १२ लाख ६४ हजार ३०९ कित्ता सूचीकृत धितोपत्र किनबेच हुँदा ३ अर्ब २९ करोड ३९ लाख रुपैयाँको कारोबार भएको छ ।
जसमध्ये सन् नेपाल लाइफ इन्स्योरेन्सको सेयर सर्वाधिक २० करोड १८ लाखको कारोबार भएको छ । नेप्सेमा सूचीकृत भएर बिहीबार नै कारोबार सुरु भएको कम्पनीको सबैभन्दा धेरैको सेयर किनबेच हुँदा रिलायबल लाइफ इन्स्योरेन्सको १३ करोड ९७ लाख र शिवम् सिमेन्टको १० करोड ५३ लाख रुपैयाँको सेयर कारोबार भएको छ ।
बिहीबार नेप्सेमा कुल २३० सूचीकृत कम्पनीको सेयर कारोबार भएको छ । जसमध्ये २१७ कम्पनीको सेयरमूल्य वृद्धि हुँदा ११ कम्पनीको सेयरमूल्यमा गिरावट भएको छ । यस्तै २ कम्पनीको सेयरमूल्य भने स्थिर छ । बिहीबार ४ कम्पनीको सेयरमूल्य १० प्रतिशत र २ कम्पनीको सेयरमूल्य ९.९९ प्रतिशतले वृद्धि भएको छ । यस्तै सेयरमूल्य धेरै बढ्ने १० कम्पनीमा स्वाभिमान लघुवित्त बाहेक सबै हाइड्रोपावर मात्रै छन् ।
सेयरमूल्य सबैभन्दा धेरै घट्नेमा भने अभियान लघुवित्तको सर्वाधिक ३.९८ प्रतिशतले गिरावट हुँदा सामुदायिक लघुवित्तको १.९५ प्रतिशत र इमर्जिङ नेपालको सेयरमूल्य १.७३ प्रतिशतले गिरावट भएको छ ।
