काठमाडौं : अपर तामाकोसी हाइड्रोपावर कम्पनीको हकप्रदमा आवेदन दिने म्याद सकिएको छ। दोलखामा सञ्चालित ४५६ मेगावाटको माथिल्लो तामाकोसी जलविद्युत् आयोजनाको प्रवर्द्धक कम्पनीले गत भदौ १८ गतेदेखि सेयरधनीलाई शतप्रतिशत अर्थात् १ कित्ता सेयरबराबर एक कित्ताको प्रतिसेयर १०० रुपैयाँ अंकित दरको हकप्रद सेयर निष्कासन गरेको हो।
कम्पनीका अनुसार संस्थापकहरू नेपाल विद्युत् प्राधिकरण, नेपाल दूरसञ्चार कम्पनी लि. (नेपाल टेलिकम), नागरिक लगानी कोष र राष्ट्रिय बिमा संस्थानले आफ्नो सेयर अनुपातमा हकप्रद सेयरबापतको रकम शतप्रतिशत चुक्ता गरेका छन्। उनीहरूले ५ अर्ब ४० करोड ९ लाख रुपैयाँ चुक्ता गरेका हुन्।
कम्पनीको ४९ प्रतिशत साधारण सेयरमध्ये सर्वसाधारणहरूबाट ५ अर्ब १८ करोड ९१ लाख रुपैयाँ चुक्ता हुनु पर्नेछ। जसमध्ये सोमबार साँझसम्म ३ अर्ब ८ करोड ६० लाख रुपैयाँको आवेदन परेको सीडीएससीले जनाएको छ। हकप्रदमा २ लाख ७५ हजारले आवेदन दिएका हुन्। यद्यपि भौतिक रूपमा परेको आवेदन सीडीएससीको विवरणमा समावेश छैन।
कम्पनीको प्रमुख कार्यकारी अधिकृत मोहनप्रसाद गौतमका अनुसार आइतबार साँझसम्मै ३ अर्ब २३ करोड १५ लाख ३२ हजार ७ सय रुपैयाँबराबरको आवेदन परेको थियो। कुल ३ लाख ९ हजार २ सय ७८ आवेदकले आवेदन दिएका थिए। सोमबार आवेदन दिने स्थानमा राम्रै भीडभाड रहेकाले पनि समग्रमा ८५ प्रतिशत हकप्रद सब्स्क्राइब भएको गौतमको अनुमान छ।
