विराटनगर । चाड पर्व आएसँगै तिहारको लागि बजारमा फूलको जोहो गर्न थालिएको छ । बजारमा माग पनि बढ्दै गएको छ । प्रत्येक वर्ष तिहारका लागि भारतबाट फूल आयात हुने गरेकोमा यस वर्ष सरकारले आयातमा प्रतिबन्ध लगाएका कारण गाउँघरमा उत्पादन गरिएको फूलबाट आन्तरिक माग पूरा गर्नुपर्ने चुनौतीमा व्यवसायीहरु छन् ।
ढिलो तिहार भएकोले गाँउ घरमा ढकमक्क फूल फुलिसकेका छन् । तिहारलाई मध्यनजर गर्दै फूल व्यवसायीहरुले फूल संकलन गर्ने र बजारमा ल्याउने तयारी गरिरहेका छन् । तिहारमा सबैभन्दा बढि सयपत्री फूलको प्रयोग हुने गर्दछ । गाई पुज्नेदेखि भाइ पुज्नका लागि सयपत्री फूलको उपयोग हुने गरेको छ ।
फूललाई बजारसम्म पु¥र्याउन विराटनगरको रानी स्थित डाइमन्ड नर्सरीका संचालक सर्फे हालम नर्सरीमा फूल फुलाउन सक्रिय छन् । नर्सरीमा लगाइएको सयपत्री फूल चाहेको दिनमा फूलाउन सकिने भएकोले केही दिनयता उनको सक्रियता बढेको हो ।बजारबाट फूलको माग आउन थालेको र मानिसहरु नर्सरीमै पुगेर बिरुवा किन्ने क्रम पनि बढेको उनले बताए । सयपत्री फूलका लागि दुई महिना अगाडिदेखि नै मिहेनत गर्नु पर्ने उनले बताए । उन्नत जातको यो फूलको बिऊ भने भारतबाट आयात गर्ने गरिएको छ ।
त्यसैगरी हाईटेक नर्सरीका कर्मचारी दुखन महतोले तिहारको समयमा अरुबेला भन्दा फूलको राम्रो व्यापार हुने बताए । अन्य समयमा खासै व्यपार नभएपनि चाडपर्वको समयमा भने फूलेका सयपत्री फूल र बिरुवाहरु बिक्री हुने गरेको र खासगरी सयपत्रीको बिरुवा धेरै मात्रामा बिक्री हुने गरेको उनले बताए ।
फूलको बिरुवा किन्न आएका टेक बहादुर भण्डारी भन्छन्, ‘यस पटक तिहार कत्तिकको अन्तिमतिर परेकोले घरमा रोपिएका फूलहरु ढकमक्क फूलिसकेका छन् । तिहार आउनजेलसम्म सायद फूलहरु ओइलाएर सकिने सम्भावना पनि उतिकै छ । त्यसैले बिरुवा किन्नेको संख्या बढेको हनुसक्छ ।’
फूलको बिरुवा किन्न आएकी विराटनगरकी अनुषा शर्मा भन्छिन् , ‘यस पटक भारतबाट फूल ल्याउन रोक लागाएको भन्ने सुनिएको छ, बजारमा फूलको अभाव हुनसक्ने सम्भावना देखेर बिरुवा नै किनेर लैजान लागेको हुँ, घरमै फुलाउन सक्दा अरु बेलालाई पनि काम दिन्छ ।’ गाउँबाट पर्याप्त मात्रामा फूल नआएको खण्डमा महंगी बढ्न सक्ने व्यवसायीहरुले बताएका छन् ।
