आईपीएल : गुजरातको मुम्बई इण्डियन्समाथि ६ रनको रोमाञ्चक जित

काठमाडौं । इन्डियन प्रिमियर लिग (आईपीएल)मा गुजरात टाइटन्सले विजयी सुरुवात गरेको छ । गएराति सम्पन्न खेलमा गुजरातले मुम्बई इण्डियन्समाथि ६ रनको रोमाञ्चक जित दर्ता गरेको हो । सुरुवाती १२ ओभरमा २ विकेट गुमाएर १ सय ७ रन बनाएको मुम्बईले अन्तिम ८ ओभरमा ५ विकेट गुमाएर ५५ रन मात्र जोड्न सकेपछि हार बेहोर्नु पर्यो । आईपीएलमा पहिलो पटक कप्तानी गरिरहेका शुभमन गिलले कप्तानको रुपमा पहिलो खेल जिते ।

अहमदाबादको नरेन्द्र मोदी स्टेडियममा सुरुवाती ब्याटिङ गरेको गुजरातले २० ओभरमा ६ विकेट गुमाएर १ सय ६८ रन बनायो । गिलले २२ बलमा ३१ रन जोडे । गुजरातका लागि साई सुदर्शनले ३९ बलमा सर्वाधिक ४५ रन बनाए । राहुल तेवातियाले २२ तथा रिद्धिमान शाहले १९ रन बनाए । मुम्बईका जसप्रित बुम्राहले ३ विकेट लिए । जेराल्ड कोट्जीले २ तथा पियुस चावलाको नाममा १ विकेट रह्यो ।

गुजरातले दिएको १ सय ६९ रनको लक्ष्य पछ्याएको मुम्बईले निर्धारित २० ओभरमा ९ विकेट गुमाएर १ सय ६२ रन मात्र बनाउन सक्यो ।अन्तिम ओभरमा मुम्बईलाई जितका लागि १९ रनको आवश्यकता रहेको थियो । मुम्बईका कप्तान हार्दिक पन्ड्याले उमेश यादवको पहिलो दुई बलमा छक्का र चौका प्रहार गरे । तर त्यसपछि उमेश यादवले लगातार दुई बलमा हार्दिक र पियुस चावलालाई आउट गर्दै खेल गुजरातको पक्षमा मोडे ।बाँकी दुई बलमा ९ रन चाहिएकोमा मुम्बईले २ रनमात्र जोड्न सक्यो ।

मुम्बईका लागि ओपनर रोहित शर्माले ४३ रनको योगदान दिए । डेवाल्ड ब्रेभिसले सर्वाधिक ४६ रन बनाए । तिलक बर्मा २५ तथा नमन धिर २० रनमा आउट भए । गुजरातका लागि स्पेन्सर जोन्सन, मोहित शर्मा र अजमतुल्लाह ओमारजाईले २-२ विकेट लिए ।

हिजै भएको पहिलो खेलमा राजस्थान रोयल्सले लखनऊ सुपर जायन्ट्सलाई २० रनले पराजित गरेको थियो । आईपीएलमा आज पञ्जाब किङ्स र रोयल च्यालेन्जर्स बैङ्लोरबीच खेल हुनेछ ।

• संसद विघटन