प्रदेश १ : प्रदेशसभामा एमाले पहिलो, कांग्रेस दोस्रो
साझा परिवेश
आइतवार, मंसिर ११, २०७९ 0८:0९
विराटनगर । प्रदेश १ मा प्रदेशसभातर्फ नेकपा एमाले ठूलो दल बनेको छ । प्रदेशसभामा प्रत्यक्ष तर्फ सबैभन्दा धेरै क्षेत्र जित्दै एमाले ठूलो दल बनेको हो । पछिल्लो मतपरिणाम अनुसार ५६ क्षेत्रमध्ये ४४ वटा क्षेत्रको नतिजा सार्वजनिक भइसकेको छ । जसमध्ये १८ वटा क्षेत्र एमालेले जितेको छ । नेपाली कांग्रेसले १३ र नेकपा माओवादी केन्द्रले ९ वटा क्षेत्र जितेको छ । नेकपा एकीकृत समाजवादी पार्टीले २ र राष्ट्रिय प्रजातन्त्र पार्टी (राप्रपा) ले एउटा २ क्षेत्र जितेको छ ।
२०७४ सालको निर्वाचनमा प्रदेशसभामा एमालेको एकल बहुमत थियो । ५६ निर्वाचितसहित ९३ जना प्रदेशसभा सदस्य रहेको प्रदेश १ मा एमालेका ५१ जना सांसद थिए । जसमा ३६ जना निर्वाचित भएका थिए । कांग्रेसबाट ८ जना निर्वाचित सहित २१ जना सांसद थिए ।
११ वटा क्षेत्र जितेको माओवादीका समानुपातिक ५ सहित १६ जना सांसद थिए । एक जना निर्वाचितसहित जनता समाजवादी पार्टी (जसपा) को ३ र संघीय लिम्बुवान राष्ट्रिय मञ्च र राष्ट्रिय प्रजातन्त्र पार्टी (राप्रपा) बाट एक–एक जना समानुपातिक सांसद थिए ।
