प्रधानमन्त्रीको राजीनामा माग्दैमा दिनुपर्छ भन्ने छैन : मन्त्री शर्मा
साझा परिवेश
शुक्रबार, असार २२, २०८० १३:५४
विपक्षीले माग्ने र प्रधानमन्त्रीले राजीनामा दिँदै हिँड्ने अभ्यास छैन ।
गठबन्धन दल र जनता सरकारको साथमा छ सरकार ढल्दैन ।
काठमाडौं ।।
सञ्चार तथा सूचना प्रविधि मन्त्री रेखा शर्माले सरकार ढल्ने कुनै सम्भावना नरहेको बताएकी छन् । विपक्षीले माग्ने र प्रधानमन्त्रीले राजीनामा दिँदै हिँड्ने अभ्यास नभएको उनले बताइन् ।
प्रेस सेन्टर नेपालले शुक्रबार काठमाडौंको संवाद डबलीमा गरेको पत्रकार भेटघाट कार्यक्रममा बोल्दै मन्त्री शर्माले भनिन्, ‘विपक्षीले माग्ने र प्रधानमन्त्रीले राजीनामा दिँदै हिँड्ने सम्भवत कुनै पनि प्रजातान्त्रिक मुलुकमा छैन ।’ गठबन्धन दल र जनता सरकारको साथमा रहेको भन्दै उनले सरकार नढल्ने बताइन् ।
सरदार प्रितम सिंहको पुस्तक विमोचन कार्यक्रममा प्रचण्डले आफूलाई प्रधानमन्त्री बनाउन प्रितम सिंह पटक-पटक दिल्ली गएको भनेपछि उनको आलोचना भइरहेको छ । प्रचण्डको यही अभिव्यक्तिपछि संसदमा अवरोध गर्दै आएको एमालेले प्रधानमन्त्रीको स्पष्टीकरणले नपुग्ने र राजीनामा दिनुपर्ने बताएको छ । तर मन्त्री शर्माले प्रधानमन्त्रीले राजीनामा नदिने बरु संसदमा आफ्ना कुरा राख्ने जानकारी गराइन् ।
