मन्त्रालयले जेठ ८ गतेको मन्त्रीस्तरीय निर्णयअनुसार भाडादर समायोजन गर्यो
भाडा दिँदा ठगीमा वा कसैले बढी भाडा लिएमा यातायात समितिले कारबाही गर्ने
काठमाडौं ।।
वाग्मती प्रदेश सरकारले पछिल्लो पटक जेठ ११ गतेदेखि लागु हुनेगरी सार्वजनिक सवारीको नयाँ भाडादर लागु गरेको थियो । प्रदेशको श्रम रोजगार तथा यातायात मन्त्रालयले जेठ ८ गतेको मन्त्रीस्तरीय निर्णयअनुसार भाडादर समायोजन गरेको हो । मन्त्रालयले काठमाडौं उपत्यकामा चल्ने सार्वजनिक सवारीका लागि छुट्टै भाडादर तोकेको छ ।
उपत्यकामा बस्ने कतिपय सेवाग्राहीहरूले सार्वजनिक सवारीमा चढ्दा भाडादरबारे अज्ञविज्ञ भएको महसुस गर्ने गरेका छन् । कतिपयले भने तोकिएको भन्दाबढी भाडा मागेर ठगिएको समेत गुनासो गर्छन् । यातायात मन्त्रालयका सूचना अधिकारी खगेन्द्र पौडेलले पेट्रोलियम पदार्थको मूल्य पाँच प्रतिशत घटबढ हुँदा भाडा समायोजन गरिने बताए । भाडा दिँदा ठगीमा वा कसैले बढी भाडा लिएमा यातायात समितिले आन्तरिकरूपमै कारबाही गर्ने गरेको उनको भनाइ छ ।
यस्तै, सडक सुरक्षामा खटिएका ट्राफिक प्रहरीले पनि ठगिएको गुनासो आएमा सम्बोधन गर्ने र ठूलै समस्या भएमा मन्त्रालयले नै पनि काम गर्ने उनले बताए । प्रदेश राजपत्रमा प्रकाशित मन्त्रालयको भाडादर अनुसार काठमाडौं उपत्यकामा
० देखि ५ किलोमिटरसम्मको भाडा १९ रुपैयाँ तोकिएको छ । ० देखि १० किलोमिटरसम्मको भाडा २५ रुपैयाँ रहेको छ । ० देखि १५ किलोमिटरसम्मको भाडा ३० रुपैयाँ रहेको छ । ० देखि २० किलोमिटरसम्मको भाडा ३३ रुपैयाँ रहेको छ, र २० किलोमिटर भन्दामाथिको भाडा ३८ रुपैयाँ रहेको छ ।
यसअघि गत वर्ष २०७९को असार ५ देखि लागु भएको भाडादर रहेको थियो । त्यतिबेला ० देखि ५ किलोमिटरसम्मको भाडा २० रुपैयाँ, १० किलोमिटरसम्मको २७, १५ किलोमिटरसम्मको ३२ रुपैयाँ, २० किलोमिटरसम्मको २५ रुपैयाँ र २० किलोमिटर भन्दामाथिको भाडा ४० रुपैयाँ रहेको थियो ।
