पुरस्कारको व्यवस्था नभएको भए सुन समाउन सकिन्नथ्यो : अर्थमन्त्री

• पुरस्कारको व्यवस्थाका कारण करिब १०० किलो सुन बरामद
• सुन तस्करी प्रकरणको अनुसन्धान जारी
• गैरकानुनी काम गर्ने जो कोहीमाथि कारबाही हुने

काठमाडौं ।।

आर्थिक वर्ष २०८०-०८१ मा ल्याएको सूचना दिनेलाई पुरस्कारको व्यवस्थाका कारण करिब १०० किलो सुन बरामद गरिएको अर्थमन्त्रीले  जिकिर गरे । सुन तस्करी प्रकरणमा अहिले अनुसन्धान भइरहेको र गैरकानुनी काम गर्ने जो कोहीमाथि कारबाही हुने डा. महतले बताए ।

भन्सारमा प्रविधिको अपडेट र आधुनिक मेसिन जडान गर्नुपर्ने आवश्यकता रहेको उनले औँल्याए । भन्सारमा हुने अनियमिततालाई निस्तेज पार्नुपर्नेमा उनले जोड दिए ।

“…मैले बजेटमा नै प्रस्ताव गरेको हो कि यो भन्सारमा कतिपय कुराहरूलाई, अनियमित कुरा निस्तेज गर्न पुरस्कारको व्यवस्था गरेको छु, सूचना दिनेलाई यो व्यवस्था बीचमा हटेको थियो । मलाई लाग्छ, त्यसले पनि यो सूचना प्राप्त गरी पक्राउ गर्न मद्दत पुग्यो । हामी जुन यो सुन प्रकरण छ, त्यसको जरोसम्म नै पुगेर अनुसन्धान प्रक्रिया अघि बढेको छ,” उनले भने, “कतिपय अवस्थामा यस्ता घटना हुन्छन्, त्यसमा राज्य सुशासन कायम गर्न त्यस्ता दुरुपयोग, अनियमितता, गैरकानुनी काम गर्न नदिन कटिबद्ध छ । त्यहीअनुसार काम भइरहेको छ । छानबिनका लागि अनुसन्धान टोली बनाएर हामीले काम गरिरहेका छौँ । अब त्यस्ता कुरा हुन नदिन आधुनिक मेसिन जडान, अपडेट गर्ने, कर्मचारीहरूमा उदासीनता भएको भए कारबाही हुन्छ, भइसकेको पनि छ । यसमा पारदर्शी ढंगबाट अनुसन्धान भई कारबाही हुन्छ । राज्य संयन्त्र गम्भीर छ ।”

पार्टी केन्द्रीय कार्यसमितिको बैठक लाइभ गरेसँगै भ्रम छर्न सक्ने गुञ्जायस नरहेको उनले बताए । बैठक लाइभ गरिँदा राम्रो प्रतिक्रिया पाइरहेको उनको भनाइ छ ।

• संसद विघटन