विराटनगरको निरौला ट्रेडर्समा ‘काँटा’ अनुमति बेगार प्रयोग

विराटनगर । विराटनगरस्थित ‘निरौला ट्रेडर्स’ ले इलेक्ट्रिक ‘काँटा’ अनुमति बेगार संचालन गरेको पाइएपछि कारबाही हुने भएको छ । ६ वर्षदेखि चाँदनी चोकमा हार्डवेयरको सामान बिक्री वितरण गर्ने काँटा अनुमति बेगार संचालन गरेको शुक्रवार अनुगमनको क्रममा फेला पारेपछि गुणस्तर तथा नापतौल कार्यालय विराटनगरले कारबाही गर्ने भएको हो ।

हार्डवेयरले इलेक्ट्रिक ‘काँटा’ राखेर सामाग्री विक्री वितरण गरेको ३० दिनभित्रमा गुणस्तर तथा नापतौल कार्यालयबाट अनुमति लिनुपर्ने हुन्छ । तर, निरौलाट्रेडर्सले विगत ६ वर्षदेखि अनुमति बेगार काटा संचालन गरेको भेटिएको हो ।

अनुगमनपछि निरौलालाई तीन दिन भित्र सम्पूर्ण कागजपत्र लिएर कार्यालयमा हाजिर हुन निर्देशन दिएको गुणस्तर तथा नापतौल कार्यालय विराटनगरका निरीक्षक रजनिस साहले जानकारी दिए । दर्ता बेगार संचालन गर्ने पसललाई नापतौल ऐन अनुसार कारबाहीको दायरामा ल्याउने उनले बताए ।

निरौला ट्रेडर्सले रडमा ट्र्याक चेन्ज गरेर रड बिक्री गर्ने गरेको उपभोक्ताले आरोप लगाएका छन् । उनले १ सय ९ केजी तौलको ट्र्याक भएको रड बिक्री गरेपछि ९० देखि ९७ केजी रडमा ट्र्याक लगाउने गरेको आरोप छ । यसरी ट्र्याक चेन्ज गरेको रड उनले अन्य खुद्रा पसलहरू भन्दा प्रतिकेजी २ रुपैयाँ सस्तोमा उपभोक्तालाई बिक्री गर्ने गरेको गुनासो रहेको छ । यस विषयमा पनि अनुसन्धान गर्ने गुणस्तर तथा नापतौल कार्यालयले जनाएको छ ।

बिहीबार एक जना उपभोक्ताले ५ केजी काँटी खरिद गर्दा २ सय ५० ग्राम कम तौल भेटिएको थियो । यता निरौला ट्रेडर्सका संचालक अनन्त निरौलाले विविध कारणले ढिलाइ भएकोले गर्दा अब गुणस्तर तथा नापतौल कार्यालयबाट अनुमति लिएर काँटा संचालन गर्ने बताए । तौलको विषयमा भने पसलबाट कुनै पनि उपभोक्तालाई कम सामाग्री नदिएको दाबी गरेका छन् ।

• संसद विघटन