घाइतेको उपचार खर्च ब्यहोर्ने सर्तसहित हाजिर जमानीमा छुटे कमिडी च्याम्पीयनका निर्देशक विशाल भण्डारी
साझा परिवेश
सोमवार, चैत्र १२, २०८० १५:0७
दुई दिनदेखि प्रहरी नियन्त्रणमा रहेका टेलिभिजन रियालिटी शो ‘कमेडी च्याम्पियन’ का निर्देशक विशाल भण्डारीसहित दुई जना हाजिर जमानीमा छुटेका छन्।
भक्तपुरस्थित प्रहरी वृत्त जगातीको हिरासतमा रहेका उनीहरूलाई शनिबार हाजिर जमानीमा छाडिएको जिल्ला प्रहरी परिसर भक्तपुरका डिएसपी बसन्त पाठकले जानकारी दिए। कमेडी च्याम्पियनको टिम चढेको कार दुर्घटनामा परेर सामान्य घाइते भएका निर्देशक भण्डारी र पुजन अधिकारीलाई घाइतेका परिवारसँग सहमति गरी छाडिएको डिएसपी पाठकले जनाए। सहमतिअनुसार निर्देशक भण्डारीले घाइतेको सबै उपचार खर्च ब्यहोर्नुपर्ने छ। गत बिहीबार बिहान साढे ३ बजे भक्तपुरस्थित सूर्यविनायक नगरपालिका वडा नम्बर १० मा कार दुर्घटना भएको थियो। बागमती प्रदेश ०१-०२६ च ०३५९ नम्बरको कार अनियन्त्रित भई टिपरमा ठोक्किँदा ६ जना घाइते भएका थिए।
मापसे गरी सवारी चलाउँदा दुर्घटना भएको प्रहरीको निष्कर्ष रहेको डिएसपी पाठकले बताएका छन् । कार निर्देशक भण्डारीले चलाएको बताइएको छ।
