देशभरका सरकारी विद्यालयमा अंग्रेजी माध्यमबाट पढाउनु पर्छ : डा.आरजु
साझा परिवेश
बुधबार, बैशाख ६, २०८० १४:४८
काठमाडौं। सांसद् डा.आरजु राणा देउवाले सरकारी शिक्षा क्षेत्रको पुनरावलोकन हुन जरूरी रहेको बताएकी छन् । बुधबार प्रतिनिधिसभा बैठकको विशेष समयमा बोल्दै सांसद् डा.राणाले नेपालको सरकारी शिक्षा प्रणालीमा ठूलो प्रश्न चिन्ह खडा भएको भन्दै शिक्षामा सुधार अहिलेको आवश्यकता रहेको बताएकी हुन् ।
राणाले भनिन्,‘सरकारी शिक्षा प्रणालीमा ठूलो प्रश्न उठेको छ । लगानीअनुसार प्रतिफल नमिल्नु निरासाजनक कुरा हो । शिक्षा क्षेत्रको सुधार तथा सुशासन अभिवृद्धि गर्न आवश्यक छ ।’
आधारभूत तथा माध्यामिक तहको निरन्तर मुल्याकंन र रेकर्डका लागि पृष्ठपोषण प्रदान गर्नुपर्ने उनले बताइन् । उनले नतिजामा आधारित रहेर विद्यालय र शिक्षकलाई पुरस्कार र दण्डको व्यवस्था हुनुपर्ने बताइन् । उनले भनिन्, ‘विद्यालय व्यवस्थापन समिति गठनमा राजनीतिकरण हुनुहुँदैन । निर्देशीका अद्यावधिक हुनुपर्छ । देशभरका सरकारी विद्यालयमा आधारभूत तहमा अंग्रेजी माध्यमबाट पढाउने तयारी थाल्नुपर्छ । त्यसका लागि नीति नियम र स्रोत साधनको सुनिश्चितता गरिनुपर्छ । ’
