टप भेरियन्ट ‘एल ३’को मूल्य एक करोड ८७ लाख रुपैयाँ पर्ने
काठमाडौं ।।
पायोनियर मोटो कर्पले नेपालमा निसानको नयाँ गाडी निसान एक्स–ट्रायल सार्वजनिक गरेको छ । शुक्रबार काठमाडौंमा आयोजित कार्यक्रममा निसानको दक्षिण एसिया निर्यात प्रमुख रघुनाथ नैर, पायोनियरका प्रबन्ध निर्देशक सन्दीप शारडा, निर्देशक गौरव शारडालगायत व्यक्तिले गाडी सार्वजनिक गरेका हुन् । ई-पावरबाट सञ्चालित अत्याधुनिक प्रविधि र डिजाइनको गाडीमा ट्विन-मोटर ई-फोर्स अल-ह्विल ड्राइभ प्रणाली छ । निसान मोटर कम्पनीको नेपालका निम्ति आधिकारिक वितरक पायोनियर पोटो कर्पले चौथो जेनेरेसनको एक्स-ट्रायल नेपालमा सार्वजनिक गरेको हो ।
सन् २००१ मा एक्स-ट्रायलको पहिलो जेनेरेसनदेखि हालसम्म विश्भर ७० लाखभन्दा यी गाडी बिक्री भएको निसानले जनाएको छ । एक्स-ट्रायल ई-पावर एसयूभी पेट्रोल इन्जिन ब्याकअप भएको गाडी हो । गाडीले ईभीजस्तै ड्राइभिङ अनुभव दिने र दक्षिण एसियामै पहिलोपटक नेपालमा यो गाडी सार्वजनिक गरिएको निसानको दक्षिण एसिया निर्यात प्रमुख नैरले बताए । चौथो जेनेरेसनको एक्स-ट्रायलमा अघिल्ला संकरणभन्दा उन्नत संरचना, प्रविधिसहितको एसयूभी डिजाइन र अल-ह्विल ड्राइभसहितको पावरट्रेन सुविधा रहेको कम्पनीले जनाएको छ ।
सातजनाको सिट क्षमता रहेको गाडीमा अधिकतम १५७ किलोवाटको पावर आउटपुट छ । अधिकतम टर्क फ्रन्टमा ३३० र रेयरमा १९५ एनएम छ । यो गाडीले प्रतिकिलोमिटर १४६ देखि १४८ ग्राम कार्बन्डाइअक्साइड उत्सर्जन गर्ने कम्पनीले जनाएको छ । शून्यदेखि १०० किलोमिटरको गति ७.२ सेकेन्डमा दिने एक्स-ट्रायलको नेपालमा सार्वजनिक टप भेरियन्ट ‘एल ३’को मूल्य एक करोड ८७ लाख रुपैयाँ रहेको निसानले जनाएको छ ।
