काठमाडौं । कांग्रेस–माओवादी केन्द्रसहितको गठबन्धन सरकारमा आलोपालो सरकारको नेतृत्व लिने विषय सार्वजनिक
भएपनि यसलाई नेताहरुले औपचारिक रुपमा स्वीकार गरिसकेका छैनन् ।
प्रधानमन्त्री पुष्पकमल दाहाल ‘प्रचण्ड’ले आफू नेतृत्वको सरकार पाँचै वर्ष जाने दाबी समेत गर्न छाडेका छैनन् ।
यहि परिस्थितिमा कांग्रेस सभापति शेरबहादुर देउवाले कांग्रेसले सरकारको नेतृत्व गर्ने संकेत गर्दै आलोपालोको विषय उप्काएका छन् ।
सत्ता गठबन्धनभित्रको नेकपा एकीकृत समाजवादीले समेत प्रधानमन्त्रीमा दाबी गरिरहेको छ ।
माधव नेपाललाई प्रधानमन्त्री बनाउने विषय गठबन्धनमा सहमति जुटेको समेत बताइन्छ । तर, सहमतिको विषय बाहिर सार्वजनिक गर्दा कर्मचारी संयन्त्रलाई
चलाउन गाह्रो हुने मनशायका कारण पनि दलहरुले यस्तो विषयलाई सकेसम्म गोप्य राख्ने गर्छन् ।
सरकार र सत्तालाई प्रभावकारी ढंगले प्रयोग गर्ने यो नै उत्तम विकल्प भएको दाबी पनि गरिन्छ । तर, संक्रमणकालीन अवस्थामा बनेको सरकार र यसको
संयन्त्रलाई भने दलका शीर्ष नेताहरुले नै प्रहार गर्दै आएका छन् ।
नेकपा एकीकृत समाजवादीका सम्मानित नेता झलनाथ खनालले गठबन्धनलाई हल्का ढंगले विश्लेषण गर्ने गरेका छन् । गठबन्धन फेरिएको र आफ्नो पार्टी
सहभागी भएको विषयमा समेत उनलाई चित्त बुझेको देखिन्न ।
राष्ट्रपति बन्ने योजनामा रहेका उनलाई सत्ता गठबन्धनले यस्तो अवसर नदिएपछि उनी चिढिएको देखिन्छ । तर, यता कांग्रेस सभापति शेरबहादुर देउवाले
समेत कांग्रेसले सरकारको नेतृत्व लिने दाबी गरेका छन् ।
कांग्रेसले सरकारको नेतृत्व गर्ने बताएका देउवाले आफ्नो पार्टीको सरकार नभएकाले सोचेजस्तो काम गर्न पनि नसकिने बताए ।
यसले देउवा आफू प्रधानमन्त्री नबनेकोमा कतै न कतै पश्चाताप पनि देखिन्छ ।
न्यूनतम साझा कार्यक्रम नै ल्याएर सरकारमा सहभागी भएको कांग्रेसले साझा सरकार भएकाले सोचे जस्तो काम गर्न नसकिने बताउनु बहुमत प्राप्त गर्न नेता कार्यकर्तालाई तयारी गर्न
अपिल गर्नु मात्रै नभएर सरकारमाथिको अविश्वास पनि हो ।
१० दलीय सत्ता गठबन्धन उपचुनावमै गठबन्धनभित्र उपगठबन्धनको अवस्थामा पुगेकाले पनि सरकारको स्थीरतामा प्रश्न उठिरहेको बेला देउवाले यस्तो बताएपछि आशंका थप चुलिन पुगेको छ ।
यता, एमालेले पनि माओवादी केन्द्र र प्रचण्डलाई सरकारबाट बाहिर ल्याउन सकेको कसरत गर्ने अवस्था देखिएको र देउवाको यस्तो अभिव्यक्तिका
कारण कतै सरकार धरापमा पर्न थालेको त छैन ? प्रश्न उठ्न थालेको छ ।
यसअघि प्रधानमन्त्री बन्न ठिक्क परेका देउवालाई नटेरेका प्रचण्ड बालकोटाको सहयोगमा प्रधानमन्त्री बनेका थिए ।
यहि रिस कांग्रेस र देउवाले पोख्ने अवस्था बनेमा फेरि सरकार र सत्ताको नयाँ राजनीति शुरु हुनेमा कुनै आशंका छैन् ।
