काठमाडौँ । दक्षिण अफ्रिकाको भ्रमणमा रहेको भारतीय क्रिकेट टोली दोस्रो टी–२० खेलमा पराजित भएको छ । मंगलबार राति भएको खेलमा दक्षिण अफ्रिका ५ विकेटले विजयी बनेको हो ।
डीएलएसबाट १५ ओभरमा १ सय ५४ रनको संशोधित लक्ष्य पाएको दक्षिण अफ्रिकाले उक्त लक्ष्य ७ बल अगावै ५ विकेटको क्षतिमा पछ्यायो । दक्षिण अफ्रिकाका लागि ओपनर रिजा हेन्डरिक्सले सर्वाधिक ४९ रन बनाए भने कप्तान एडन मार्क्रमले ३० रनको योगदान दिए । ट्रिस्टन स्टब्स र एन्डिले फेलुक्वायोले नटआउट रहँदै क्रमशः १४ र १० रन बनाउँदै टोलीलाई विजयी लक्ष्यसम्म पुर्याए । भारतका लागि मुकेश कुमारले २ तथा मोहम्मद शिराज र कुल्दीप यादवले १–१ विकेट लिए ।
यसअघि टस हारेर पहिले ब्याटिङ गरेको भारतले रिंकु सिंह र कप्तान सूर्यकुमार यादवको विस्फोटक ब्याटिङको मद्दतले १९.३ ओभरमा ७ विकेटको क्षतिमा १ सय ८० रन बनाएको थियो । सिंहले ३९ बलमा ६८ रन बनाए भने यादवले ३६ बलमा ५६ रन हिर्काए । तिलक वर्माले २९ रन बनाए । दक्षिण अफ्रिकाका लागि जेराल्ड कोटजीले ३ विकेट लिए ।
जीतसँगै दक्षिण अफ्रिकाले तीन खेलको शृङ्खलामा १–० को अग्रता बनाएको छ । पहिलो खेल वर्षाका कारण रद्द भएको थियो ।
