काठमाडौँ । सोमबार सुनको मूल्य तोलामा ७ सय घटेको छ । यस दिन प्रतितोला १ लाख ९ हजार ३ सय रुपैयाँमा सुनको कारोबार भएको नेपाल सुनचाँदी व्यवसायी महासंघले जनाएको छ । यसअघि आइतबार सुनको मूल्य अहिलेसम्मकै उच्च प्रतितोला १ लाख १० हजार रुपैयाँ पुगेको हो ।
आइतबार एकै दिन प्रतितोला २ हजार ९ सय रुपैयाँले सुनको भाउ बढेको थियो । अन्तर्राष्ट्रिय बजारको मूल्यअनुसार नेपालमा सुनचाँदीको भाउ दैनिक समायोजन हुँदै आएको छ । नेपाल सुनचाँदी व्यवसायी महासंघका पूर्व अध्यक्ष मणिरत्न शाक्यका अनुसार अमेरिकाका दुई बैंक बन्द भएयता सुनमा लगानीकर्ताको विश्वास बढ्न गई माग बढेकाले मूल्य बढ्दै गएको हो ।
स्वीटजरल्याण्डको अर्को बैंकमा पनि समस्या देखिएपछि सुनको मूल्य अझ उकालो लाग्न पुग्यो । विश्वका प्रमुख स्टक मार्केट पनि ओरालो लागेका छन्, आर्थिक मन्दी छाउने विभिन्न रिपोर्टहरुले बताइरहेका छन् यसले गर्दा सुनप्रति लगानी बढ्दा मूल्य पनि उच्च भएको होु उनले भने ।
