काठमाडौं : एसीसी मेन्स प्रिमियर कपको समूह ‘ए’मा बिहीबार कतारविरुद्ध टस हारेर ब्याटिङ थालेको नेपालले १६ औं ओभरमा चौथो विकेट गुमाएको छ। चौथो नम्बरमा क्रिजमा उत्रिएका कप्तान रोहित पौडेल ३७ बलमा २७ रन जोडेर पभिलियन फर्केका छन्।
त्रिवि क्रिकेट मैदानमा कतारका कप्तान मोहम्मद रिजलानले टस जितेर फिल्डिङ रोजेपछि घरेलु टिम क्रिजमा उत्रिएको थियो। दोस्रो ओभरमा ओपनर कुशल भुर्तेललाई दुई रनमा गुमाएको चौथो ओभरमा दोस्रो विकेट गुमाएको थियो।
वान् डाउनमा क्रिजमा उत्रिएका भीम सार्की ६ रन जोडेर पभिलियन फर्किएका छन्। यस्तै, अर्का ओपनर आसिफ शेख २७ बलमा १९ रन जोडेर आउट भएका थिए।
अहिले क्रिजमा रहेका सोमपाल कामी २ रन बनाएर खेलिरहेका छन्। यस्तै, रोहितको विकेट पतनपछि कुशल मल्ल क्रिजमा उत्रिएका छन्।
कतारका लागि गयान मुनाविराले दुई तथा इक्रामुल्लाह खान र आवाइस अहमदले एक–एक विकेट लिएका छन्। नेपालले १५.४ ओभरको खेल सकिँदा चार विकेट गुमाएर ६३ रन बनाएर खेलिरहेको छ।
नेपाल सुरुआती चारमध्ये तीन खेलमा जित निकाल्दै सेमिफाइनलमा पुगिसकेको छ। आजको खेलमा विजयी भए नेपाल समूह विजेता पनि बन्ने छ। सेमिफाइनलमा समूह एको विजेताले समूह बीको उपविजेता सँग खेल्ने छ।
