पोर्चुगलले युरो २०२४ छनोटको खेलमा लक्जेमवर्गलाई ९–० को फराकिलो अन्तरले पराजित गरेको छ । गोन्कादो इनासियो, गोन्कालो रामोस र डिएगो जवटाले दुई दुई गोल गरेको खेलमा पोर्चुगलले सानदार जित निकालेको हो ।
निलम्बनमा परेका क्रिस्टियानो रोनाल्डो बिनै मैदान उत्रेको पोर्चुगलले पहिलो हाफमा चार गोल गरेको थियो । गोनकालो इनासियोले १२ औं मिनेटमा गोल गर्दै अग्रता दिलाएका थिए । गोनकालो रामोसले १८औं र ३४औं मिनेटमा गोल गरे । त्यसपछि इनासियोले पहिलो हाफको इन्जुरी टाइममा व्यक्तिगत दोस्रो गोल गर्दा पोर्चुगल ४– ० ले अघि बढ्यो । डिएगो जोटले ५७औं र ७७औं मिनेटमा गोल गरे । रिकार्डो होर्थाले ६७औं, ब्रुनो फर्नान्डेजले ८३औं तथा जाआओ फेलिक्सले ८८औं मिनेटमा गोल गरे । पोर्चुगलले छनोटमा शतप्रतिशत नतिजालाई कायम राख्दै ६ खेलबाट १८ अंक जोडेर समूह जे को शीर्ष स्थानमा छ । लक्जेम्वर्ग ६ खेलबाट १० अंकसहित तेस्रो स्थानमा छ ।
सोही समूहको अर्को खेलमा स्लोभाकियाले लिचेन्स्टाइनलाई ३–० तथा आइसल्याण्डले बोस्निया एण्ड हर्जगोभिनालाई १–० ले पराजित गरेको छ ।
समूह डी को खेलमा वेल्सले लात्भियालाई २–० ले पराजित गरेको छ ।
