आईईएसएफको रेफ्री कोर्स उत्तीर्ण गर्ने उनीहरू पहिला नेपाली
उनीहरुले रेफ्री टायर २ को हैसियतमा ई-स्पोर्ट्सका प्रतियोगिता सञ्चालन गर्न पाउने
काठमाडौं ।।
इन्टरनेसनल ई–स्पोर्ट्स फेडेरेसन (आईईएसएफ)बाट नेपालका तीनजना प्रतिनिधिले रेफ्री लाइसेन्स पाएका छन् । वर्ल्ड ई–स्पोर्ट्स समिट २०२३ को अवसरमा दक्षिण कोरियाको बुसानमा हालै आयोजित वर्ल्ड ई–स्पोर्ट्स रेफ्री एकेडेमी–२०२३ मा नेपालका तीनजनाले सफलता हासिल गर्दै रेफ्री लाइसेन्स हात पारेका हुन् ।
आईईएसएफद्वारा भौतिक उपस्थितिमा पहिलो पटक आयोजित कार्यक्रममार्फत् रेफ्री लाइसेन्समा दुई दिने कक्षापछि भएको परीक्षामा नुवाकोटका क्षितिज श्रेष्ठ, अरुण मिश्र र सौजन्य श्रेष्ठले रेफ्री लाइसेन्स पाए । आईईएसएफको रेफ्री कोर्स उत्तीर्ण गर्ने उनीहरू पहिला नेपाली हुन् । अब उनीहरूले आईईएसएफ रेफ्री टायर २ को हैसियतमा ई–स्पोर्ट्सका प्रतियोगिता सञ्चालन गर्न पाउने छन् ।
