यू-१९ विश्वकप क्रिकेटमा आज नेपालले पाकिस्तानको सामना गर्ने

काठमाडौं । दक्षिण अफ्रिकामा जारी आईसीसी यू-१९ विश्वकपको आफ्नो दोस्रो खेलमा आज नेपालले पाकिस्तानसँग प्रतिस्पर्धा गर्दै छ । बफेलो पार्क इस्ट लन्डनमा खेल दिउँसो पौने २ बजे सुरु हुनेछ ।

सुपर सिक्समा स्थान सुरक्षित गर्न नेपाललाई आजको खेलमा जित आवश्यक छ । देव खनालको कप्तानीमा रहेको नेपाल आफ्नो पहिलो खेलमा न्युजिल्यान्डसँग ६४ पराजित भएको थियो । अर्जुन कुमान बाहेक अन्य ब्याटरले राम्रो प्रदर्शन गर्न नसक्दा नेपाल पहिलो पटक न्युजिल्यान्डसँग पराजित भएको थियो ।

आज पाकिस्तानसँग पराजित भए नेपालले शुक्रबार अफगानिस्तानलाई हराएर मात्रै पुग्ने छैन । अन्य टोली र नतिजामा पनि भर पर्नुपर्ने छ । पाकिस्तानलाई पराजित गर्न नेपाली टिमलाई ब्याटिङ र बलिङ दुवैमा सुधारिएको प्रदर्शन आवश्यक हुनेछ ।

यस्तै साद बैगको कप्तानीमा रहेको पाकिस्तान नेपाललाई पराजित गर्दै सुपर सिक्समा स्थान सुरक्षित गर्न चाहन्छ । पाकिस्तानले आफ्नो पहिलो खेलमा अफगानिस्तानविरुद्ध १ सय ८१ रनको फराकिलो जित दर्ता गरेको थियो ।

यस जितले पाकिस्तान २ अंकसहित समूह डी को दोस्रो स्थानमा छ । अंकविहीन नेपाल तेस्रो स्थानमा छ ।

यू-१९ विश्वकपमा नेपाल र पाकिस्तान तीन पटक एक अर्का विरुद्ध मैदान उत्रिएका छन् । जहाँ दुवै देशले १-१ खेल जित्दा एक खेल वर्षाका कारण रद्द भएको थियो । समग्रमा दुई देशका युवा टोली ६ पटक आमने सामने भएका छन् । जसमा नेपाल १ र पाकिस्तान ४ खेलमा विजयी भएको छ ।

विश्वकप अन्तर्गत नै आज श्रीलंका र नामिबिया तथा स्कटल्यान्ड र वेस्टइन्डिज पनि प्रतिस्पर्धा गर्ने छन् ।

• संसद विघटन