बिक्री नहुँदा काउली सस्तो, सुकेको प्याजको भने मूल्य बढ्दो
साझा परिवेश
बिहिबार, कार्तिक ३०, २०८० 0८:0७
काठमाण्डा – काठमाण्डौमा हरियो तरकारीको भाउ सस्तिएको छ । चाडपर्व मान्न कतिपय काठमाण्डौ उपत्यका बाहिर गएकोले हरियो तरकारीको माग घटेको छ । यसको असर भाउमा पनि परेको छ । कालिमाटी फलफूल तथा तरकारी बजारमा सबैजसो हरियो तरकारी सस्तो भएको छ । आज काउली किलोको १० देखि १५ रुपैयाँ थोक मूल्य रहेको कालिमाटी फलफूल तथा तरकारी बजार विकास समितिले जनाएको छ ।
समितिका अनुसार आज हाईब्रिड काँक्रो किलोको १० देखि १५, लोकल काँक्रो किलोको २० देखि २५, भन्टा किलोको २० रुपैयाँ, मुला १० देखि १५ रुपैयाँ, गोलभेडा किलोको ४० रुपैयाँ रहेको छ । बजारमा मटरकोसा र सुकेको प्याजको भने भाउ बढिरहेको छ ।
उत्पादन र आयात कम हुँदा यी तरकारीको भाउ बढेको हो । बजारमा आज मटरकोसा किलो २ सय रुपैयाँ र सुकेको प्याज किलोको १ सय १० रुपैयाँ थोक मूल्य रहेको छ । यो थोक मूल्य हो । खुद्रा पसलमा यो भन्दा महँगो पर्छ ।
