ताप्लेजुङ । प्रसिद्ध तिर्थस्थल पाथिभरामा पानीको समस्याको लागि अप लिफ्टिङ प्रविधिबाट पानी पु¥याउने योजना अन्तिम चरणमा पुगेको छ । सुन्दै अचम्म लाग्न सक्छ, तल फेदीबाट पाथिभरा डाँडामा पानी पु¥याउन त्यति सजिलो भने छैन । डाँडाको टुप्पामा मन्दिर भएकोले फेदीको पानी लानुको विकल्प छैन ।
पाथिभरा मन्दिरमा पानीको लागि ५६ सालमा कुहिरोबाट पानी निकाल्ने प्रविधि सामुदायिक विकासको लागि वैकल्पिक समूह नामको संस्थाले नेपाल स्वास्थ्यको लागि पानी भन्ने संस्थासँग मिलेर क्यानाडियन प्रविधि जालीबाट कुहिरोको पानी संकलन गर्ने योजना संचालन गरेको थियो ।
कुहिरो पानी खासै प्रभावकारी नभए पछि सोहि संस्थाको सहकार्यमा पुनः नेपाल स्वास्थ्यको लागि पानी र पाथिभरा मन्दिर क्षेत्र संरक्षण तथा सम्वद्र्धन समितिसंग मिलेर आकासे पानी संकलन परियोजना संचालन गरेको थियो । वर्षादको समयमा संकलन गरेको पानीले १२ महिना धान्न असम्भवप्रायः छ ।
पुर्व संस्कृति पर्यटन मन्त्री माननीय योगेश भट्टराईको पहलमा नेपाल सरकार संघीय खानेपानी तथा ढल व्यवस्थापन आयोजनाको ७० प्रतिशत र पाथिभरा क्षेत्र विकास समितिको ३० प्रतिशत लगानीमा ८ करोडको लागतमा अगाडी बढेको योजना अन्तिम चरणमा पुगेको कुरा पाथिभरा क्षेत्र विकास समितिका कार्यकारी निर्देशक मनमणी काफ्लेले जानकारी दिनुभयो । काफ्लेका अनुसार लिफ्टिङ चलाउनका लागि थ्रीफेज स्मार्ट मिटर ५० केभिए १, र २५ केभिए का ३ वटा नेपाल विद्युत प्राधिकरणले जडान गरिदिने वित्तिकै परिक्षण गरिने भएको छ । उक्त आयोजनाको लागि ६ ठाउँमा ६ वटा ट्याङ्की निर्माण गरिएको छ भने ४ वटा पम्पीङ मोटरको सहायताले पानी मन्दिर परिसरमा पु¥याउने योजना रहेको छ ।
