प्याब्सन इनरुवाले जिल्ला अस्पताल सुनसरीलाई गर्यो फिल्टर हस्तान्तरण
साझा परिवेश
बुधबार, पुस २५, २०८० १४:२१
गंगाराम मण्डल
इनरुवा । प्याब्सन इनरुवाले प्याब्सन दिवसका अवसरमा इनरुवा स्थित जिल्ला अस्पताल सुनसरीलाई आरो (RO) फिल्टर हस्तान्तरण गरेको छ ।
३३औँ प्याब्सन डेको अवसरमा नगर प्याब्सन इनरुवाले पौष २४ गते मंगलबार अस्पतालका बिमारी तथा कुरुवाको सहजताको लागि आरो (RO) फिल्टर हस्तान्तरण गरेको हो ।
प्याब्सन डेको अवसर पारेर नगर प्याब्सन इनरुवाका अध्यक्ष रमेश प्रसाद गुरागाईले जिल्ला अस्पताल सुनसरीकी मेडिकल सुपरिटेन्डेन्ट डा.श्रेया पंगेनीलाई फिल्टर हस्तान्तरण गरेका थिए । मेसु डा. पंगेनीले प्याब्सन इनरुवाले प्याब्सन डेमा जिल्ला अस्पताललाई आरओ फिल्टर हस्तान्तरण गरेकोमा धन्यवाद दिँदै प्राप्त सामाग्रीको पुरापुर सदुपयोग गरिने बताइन् ।
साथै आगामी दिनमा जिल्ला अस्पतालले नगर प्याब्सन इनरुवा सँग सहकार्य गर्न तत्पर रहेको बताइन् । उनले बालबालिकाको स्वास्थ्य सचेतना तथा मानसिक स्वस्थताको लागि मनोपरामर्ष लगायतमा प्याब्सनसँग मिलेर अगाडी जान चाहेको बताइन् ।
प्याब्सन इनरुवाका अध्यक्ष रमेश प्रसाद गुरागाईले प्याब्सनले सामाजिक उत्तरदायीत्व निर्वाह गर्दै विभिन्न सामाजिक कामहरुमा अग्रसरता लिदै आएको बताए । उनले प्याब्सनले जिल्ला अस्पताललाई उपलब्ध गराएको फिल्टरले थोरै भएता पनि बिमारी तथा तिनका आफन्तलाई सहज पुर्याउनेमा बिश्वास व्यक्त गरे । उनले यस अघि पनि प्याब्सनले अस्पतालका बिमारीहरुलाई सकेको सहयोग गर्दै आएको स्मरण गराउँदै आगामी दिनमा पनि सहयोग गर्दै जाने प्रतिवद्धता व्यक्त गरे ।
प्याब्सन इनरुवाले प्याब्सन डेकै अवसर पारेर मंगलबारै इनरुवा १ ढकाल टोल निवासी सचिन ढकाललाई उपचारका लागि आर्थिक सहयोग उपलब्ध गराएको छ । धेरै समयदेखि अशक्त बिमारी रहेका ढकालको थप उपचारका लागि आर्थिक अभाव रहेको थाहा पाएर प्याब्सनले केही रकम आर्थिक सहयोग गरेको प्याब्सन इनरुवाका सचिव गंगाराम मण्डलले जानकारी दिए ।
उक्त दुबै कार्यक्रममा प्याब्सन अन्तर्गतका सदस्य विद्यालयहरुको उपस्थित रहेको थियो ।
